Azərbaycan banklarında kreditləşməyə dair son vəziyyət

Azərbaycanda bankların verdiyi kreditlərin faizləri sentyabrda da sabit qalmayıb. Ötən ay manatla verilən həm istehlak, həm də biznes kreditlərinin illik faiz dərəcəsində dəyişikliklər olub. Bəzi banklarda faizlər artıb, bəzilərində isə azalıb.

Beləliklə, "Accessbank" ipoteka kreditlərinin illik faizini 24-28%-dən 28%-ə, təmir-tikinti kreditlərinin illik faizini 25-28%-dən 28%-ə qaldırıb.

"Expressbank" isə lombard kreditlərinin illik faiz dərəcəsini 36-38%-dən 33-36%-ə endirib.

İran Milli Bankının Bakı filialında illik faizlər nağd pul kreditləri üzrə 29%-dən 22-26%-ə, avtomobil kreditləri üzrə 26%-dən 18-25%-ə, lombard kreditləri üzrə isə 25%-dən 21%-ə düşüb.

"Rabitəbank"da isə illik faizlər nağd pul kreditləri üzrə 30-32%-dən 26-30%-ə endirilib, lombard kreditləri üzrə 24-29%-dən 24-36%-ə qaldırılıb. Bank illik 18-22%-lə avtomobil, illik 24-26%-lə isə ipoteka kreditləşməsini bərpa edib.

"Bank VTB Azərbaycan" isə maaşını özünün plastik kartı ilə alanlara illik 28%-lə nağd pul kreditləri verməyə başlayıb.

Biznes kreditlərinə gəlincə isə, "Bank of Baku"da makro kreditlərin illik faiz dərəcəsi 23-28%-dən 23-25%-ə düşüb.

"Dəmirbank" isə illik faizləri mikro kreditlər üzrə 25-30%-dən 26%-ə, makro kreditlər üzrə isə 16-23%-dən 16%-ə dəyişib.

"NBC Bank"da isə mikro kreditlərin illik faiz dərəcəsi 21-23%-dən 27-29%-ə, makro kreditlərin illik faiz dərəcəsi isə 20-24%-dən 21-25%-ə qalxıb.