Azərbaycanın 2024-cü il büdcəsinə edilməsi gözlənilən dəyişikliklər açıqlanıb

Maliyyə Nazirliyi mayın 24-ü axşam saatlarında 2024-cü ilin dövlət və icmal büdcələrinə edilməsi gözlənilən dəyişiklikləri – müvafiq qanun layihəsini ictimailəşdirib.

Nazirliyin internet səhifəsində yerləşdirilmiş sənəd mayın 27-si Milli Məclisin İqtisadi siyasət, sənaye və sahibkarlıq komitəsinin iclasında müzakirə olunacaq.

Beləliklə, qanun layihəsinə əsasən, Azərbaycan neftinin büdcə qiyməti hər barel üçün 15 ABŞ dolları artırılaraq 60 dollardan 75 dollara qaldırılır.

Yenidən baxılmış dövlət büdcəsinin gəlirlərinin 36 353 milyon manat (hazırda 34 173 milyon manatdır), xərclərinin isə 39 707,3 milyon manat (hazırda 36 763 milyon manatdır) təşkil edəcəyi gözlənilir. Beləliklə, büdcədə 3 354,3 milyon manat kəsir yaranmalıdır (hazırda 2 590 milyon manatdır).

Yenidən baxılmış icmal büdcəsinin isə gəlirlərinin 43 480 milyon manat (hazırda 38 998 milyon manatdır), xərclərinin isə 45 591,8 milyon manat (hazırda 42 376 milyon manatdır) təşkil edəcəyi gözlənilir. Beləliklə, büdcədə 2 111,8 milyon manat kəsir yaranmalıdır (hazırda 3 379 milyon manatdır).