Milli Məclis sosial fondların 2024-cü il büdcəsini təsdiq edib

Azərbaycan parlamentinin dekabrın 5-də keçirilmiş növbəti plenar iclasında Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun (DSMF) və İşsizlikdən Sığorta Fondunun (İSF) 2024-cü il büdcələri təsdiqlənib.

Beləliklə, gələn il DSMF-nin gəlirləri və xərcləri bu ilə nisbətən 10,4% çox - 6 919,9 milyon manat təşkil edəcək. Fondun gəlirlərinin 5 288,1 milyon manatı və yaxud 76,4%-i məcburi dövlət sosial sığorta haqlarının hesabına formalaşacaq. Bu, 2023-cü ilin təsdiq olunmuş proqnozu ilə müqayisədə 5,7% çoxdur.

Gələnilki gəlirlərin 1 392 milyon manatını (5,2% az) dövlət büdcəsindən transfert, 227 milyon manatını qalıqdan xərcə yönəldilmiş vəsait, 12,7 milyon manatını (0,8% çox) isə sair gəlirlər təşkil edəcək. Beləliklə, 2024-cü ildə DSMF-nin büdcədən asılılığı 20,1% təşkil edəcək ki, bu da 2023-cü ilə nisbətən 3,3 faiz bəndi azdır.

2024-cü ildə İSF-nin gəlirləri və xərcləri isə 2023-cü ilə nisbətən 9,3% çox – 238 milyon manat olacaq. Fondun gəlirlərinin 180 milyon manatı və yaxud 75,6%-i işsizlikdən sığorta haqlarının hesabına formalaşacaq. Bu, 2023-cü ilin gözlənilən icrası ilə müqayisədə 6,1% azdır.

Gələnilki gəlirlərin 57,9 milyon manatını (13,7% az) əvvəlki ilin sonuna istifadə olunmamış vəsait, 0,1 milyon manatını (eyni qalıb) isə sair gəlirlər təşkil edəcək. -0-