Tələbə kreditlərini kimlər ala biləcək?

Bakı/17.09.21/Turan: Oktyabrın əvvəllərindən etibarən tələbə kreditlərinin verilməsinə başlanacaq. 2021-ci ildə 40 minə yaxın tələbə bakalavr və magistratura pilləsində təhsil üçün kredit ala biləcək.

Bu barədə sentyabrın 17-də Təhsil Nazirliyi və Medianın İnkişafı Agentliyi tərəfindən KİV üçün təşkil edilmiş treninqdə nazirliyin şöbə müdiri Nicat Məmmədli bildirib.

Tələbə kreditləri iki növdə olacaq – sosial və standart.

Birinci növ kreditlər əhalinin sosial cəhətdən həssas təbəqələrindən olan tələbələrə veriləcək. Xüsusən, ünvanlı sosial yardım alan ailələrdən olan gənclər, həmçinin əlilliyi olan şəxslər bu kreditlərdən faydalana biləcək.

Bundan başqa, hər iki valideyni olmayan və ya işsiz kimi qeydiyyatda olan, yaxud yaşla əlaqədar pensiya və ya sosial yardım alan bir valideyni olan tələbələrə sosial kredit veriləcək.

Digər kateqoriyalardan olan tələbələr standart kreditlər ala biləcək.

Tələbə krediti almaq hüququna malik olmaq üçün birinci semestrdə meyar qəbul imtahanında Qəyyumlar Şurası tərəfindən müəyyən edilmiş minimum balı yığmaqdır.

Digər semestrlər üçün meyar əvvəlki imtahan sessiyasında minimum 71 bal yığmaq olacaq.

Kredit almaq üçün daha bir şərt tələbənin özünün təhsil haqqının minimum 20 faizini ödəməsidir.

Tələbə Kredit Fondu bu ilin iyununda 80 milyon manat nizamnamə fondu ilə yaradılıb. -06D-