2012-ci ildə Azərbaycanda işgəncələrdən beş nəfər ölüb

Başa çatmaqda olan il ərzində  işgəncə, pis və qeyri-insani davranışla bağlı 141 müraciət daxil olub. Bu barədə İşgəncələr Əleyhinə Komitənin rəhbəri Elçin Behbudov bu gün keçirdiyi mətbuat konfransında bildirib.

  Onun sözlərinə görə, bu il işgəncədən ən azı beş vətəndaş ölüb. “Biz komitəyə daxil olan konkret şikayətlərə əsaslanırıq. Ola bilsin ki, işgəncə faktı çoxdur, lakin zərərçəkənlərin çoxu və onların qohumları şikayət etməkdən ehtiyatlanırlar”, - o qeyd edib.

  E.Behbudov deyib ki, komitə dövlət orqanlarından öz müraciətlərinə tez-tez standart cavablar alır ki, “faktlar təsdiqlənməyib”.   

  Onun sözlərinə görə, Qobustan həbsxanasında üç nəfərin işgəncədən ölməsi faktı qeydə alınıb. Bu həbsxana Ədliyyə Nazirliyinin Penitensiar Xidmətinin tabeliyindədir.

  Digər hadisə Xanlar rayonda uşaq psixo-nevroloji internatında qeydə alınıb. Zeynəb İlyaslı vəfat edib. Anasının sözlərinə görə, qızın bədənində çoxsaylı göy ləkələr olub.

  Digər məhbus 16 saylı koloniyada saxlanılan Seymur Mikayılov Ədliyyə Nazirliyinin müalicə müəssisəsində ölüb. 

  2010-cu ildə Komitəyə 169 şikayət, o cümlədən intihar da daxil olmaqla, işgəncədən ölümlə bağlı 11 fakt daxil olub. 

  2011-ci ildə Komitəyə 136 şikayət, o cümlədən intihar daxil olmaqla, işgəncə ilə bağlı 9 ölüm faktı verilib.

  Ən çox şikayət Penitensiar Xidmətdəndir. E.Behbudov qeyd edib ki, bu qurumun rəhbərliyi onu monitorinqlərə buraxmır, lakin polis orqanlarının müvəqqəti saxlama yerlərinə, MTN-in təcridxanasına, Səhiyyə Nazirliyinin ixtisaslaşdırılmış müəssisələrinə maneəsiz gedir.

  Polis orqanlarında o, işgəncədən şikayət edənlərlə görüşmək imkanlarına malik olur. Cəzaçəkmə yerlərində şikayətlərdən sonra məhbuslar yenidən döyülür.

  Şikayətlərin daxil olduğu qurumların sırasında polis orqanları, iki internat, SOCAR-ın Təhlükəsizlik İdarəsi, Xaçmaz rayon administrasiyası rəhbərinin müavini Azər Haqverdiyev də var. 

  Ən çox yayılmış işgəncə forması rezin dəyənəklə dabana vurmadır, çünki bu iz qoymur və eyni zamanda dəhşətli ağrı verir. 

  E.Behbudov təəssüflə vurğulayıb ki, araşdırmaların nəticələrinə əsasən heç kim cinayət məsuliyyətinə cəlb olunmayıb.

 Öz növbəsində Penitensiar Xidmətinin ictimaiyyətlə əlaqələr şöbəsinin rəhbəri Mehman Sadıqov məhbusların işgəncədən ölməsi faktlarını təkzib edib. Onun sözlərinə görə, hər belə fakt üzrə prokurorluq araşdırma aparır və dustaqların doğmalarına ölümün səbəbləri barədə tibbi rəy verilir.

  E.Behbudovun Penitensiar müəssisələrə getməsinə qadağalara gəlincə, Ədliyyə Nazirliyi yanında cəzaçəkmə müəssisələrinin monitorinqi üzrə İctimai Komitə yaradılıb və komitənin tərkibi hər il yenilənir.

  M.Sadıqovun fikrincə, E.Behbudov bu komitəyə seçkilərdə iştirak edə və ya quruma müraciət edərək onun tərkibində cəzaçəkmə müəssisəsinə gedə bilər.—06D—