2019-cu ildə Azərbaycan və Aİ arasında yeni saziş imzalanacaqmı?

Bakı/25.12.18/Turan: Azərbaycan XİN-in rəhbəri Elmar Məmmədyarov 2019-cu ildə Bakı və Avropa İttifaqı arasında hərtərəfli tərəfdaşlıq haqqında sazişin imzalanması mümkünlüyü haqqında suala birbaşa cavabdan yayınıb.

"Azərbaycan Avropa İttifaqı ilə bərabərhüquqlu və qarşılıqlı səmərəli tərəfdaşlıq münasibətlərini inkişaf etdirmək istəyir. Tərəfdaşlığımızın son ili Aİ ilə əməkdaşlıq gündəliyinin təşviqi nöqteyi-nəzərdən kifayət qədər səmərəli olub", deyə Məmmədyarov bir sıra KİV-lərə müsahibəsində bildirib.

Bu zaman o, iyulun 11-də Brüsseldə Azərbaycan prezidenti İlham Əliyev və Avropa İttifaqşı Şurasının sədri Donald Tuskun iştirakı ilə Azərbaycan və Aİ arasında tərəfdaşlığın prioritetləri haqqında sənədin paraflandığını qeyd edib.

Bu sənəd oktyabrın 15-də "Şərq Tərəfdaşlığı" ölkələri nazirlərinin Lüksemburq görüşü çərçivəsində yekun şəkildə rəsmiləşdirilib.

Nazir qeyd edib ki, Aİ və Azərbaycan arasında ikitərəfli əməkdaşlıqda "mühüm mərhələ" açacaq yeni hərtərəfli saziş üzrə danışıqlar davam edir.

"Danışıqlar prosesi hələ də davam etdirilir. Təbii ki, buna müəyyən vaxt lazımdır, çünki bizə də, Aİ-dən olan tərəfdaşlarımıza da ciddi, keyfiyyətli saziş lazımdır. Bu saziş ikitərəfli münasibətlərin hüquqi əsaslarını yaradacaq və Azərbaycan və Aİ arasında müxtəlif istiqamətlərdə uzunmüddətli qarşılıqlı tərəfdaşlığı möhkəmləndirəcək. Güman edirik ki, o, bərabərhüquqlu tərəfdaşlığa və ortaq maraqlara əsaslanan strateji sənəddir. Həm də bu saziş təkcə bizə deyil, Aİ-nin üzvü olan ölkələrə də lazımdır", deyə Məmmədyarov bildirib.

Xatırladaq ki, Aİ və Azərbaycan arasında yeni hərtərəfli saziş üzrə danışıqlara hələ 2017-ci ilin fevralında start verilib.

Qeyd edək ki, 2019-cu ilin mayına qədər danışıqlar yekunlaşmasa, gələn il müqavilənin imzalanacağını gözləməyə dəyməz.

Çünki sonrakı dövrdə Avropa Parlamentinə seçkilər keçiriləcək və daha sonra Avropa Komissiyasının yeni tərkibinin formalaşdırılması prosesi başlayacaq. -06D-