ABŞ Anar Məmmədlini dərhal azad etməyə çağırıb

ABŞ son vaxtlar Azərbaycan vətəndaş cəmiyyətinə təsir edən hadisələrdən, o cümlədən Seçkilərin Monitorinqi və Demokratiyanın Tədrisi Mərkəzinin (SMDT) rəhbərinin üç ay müddətinə həbs edilməsindən narahatdır.

Bu barədə Amerikanın Bakıdakı səfirliyindən Turan-a daxil olmuş press-relizdə bildirilir.

ABŞ-ın ATƏT-dəki səfiri Daniel Bayerin bəyanatında qeyd edilir ki, “ittihamın təfərrüatları hələ də aydın deyil və Məmmədlinin saxlanılmasının onun rəhbərlik etdiyi təşkilat tərəfindən həyata keçirilən seçkilərin monitorinqi və hesabatlıq fəaliyyəti ilə bağlı olub-olmadığı sual doğurur”.

Birləşmiş Ştatlar bu məsələni Azərbaycan Hökumətinin rəhbər şəxsləri qarşısında qaldırıb və bunu davam etdirəcək. 

Amerikalı diplomat məhkəmə prosesi davam etdiyi bir vaxtda cənab Məmmədlini dərhal azad etməyə çağırıb.

“Biz Azərbaycan Hökumətini müvafiq hüquqi prosedurlara əməl etməyə, məhkəmə prosesinin şəffaflığı və ədalətliliyini təmin etməyə çağırırıq”, deyə Bayer qeyd edir. 

Bəyanatda həmçinin prezident Əliyev QHT-lər haqqında qanun layihəsini parlamentə qaytarmağa və bu qanun layihəsinin beynəlxalq standartlar və ATƏT qarşısında götürülmüş öhdəliklərə uyğunlaşdırılması imkanlarını müəyyən etmək üçün ATƏT-in Demokratik Təsisatlar və İnsan Haqları Bürosuna və Birləşmiş Millətlər Təşkilatının sərbəst toplaşmaq və birləşmək hüquqları üzrə xüsusi məruzəçisi Maina Kiaiyə müraciət etməyə çağırılır. -16D-