ABŞ Azərbaycan və Ermənistan arasında dialoqun davam etdiriləcəyinə ümid edir

Vaşinqton/03.12.22/Turan: Cümə günü Vaşinqton bir daha Azərbaycan və Ermənistan arasında dialoqun və konstruktiv atmosferin davam etdiriləcəyinə ümid etdiyini bildirib, xəbəri Turan-ın Amerikadakı müxbiri verib.

"Ümid edirik ki, iki ölkə arasında möhkəm sülhə və problemlərin həllinə nail olmaq üçün dialoq və konstruktiv atmosfer davam etdiriləcək", deyə Dövlət Departamentinin rəsmi nümayəndəsi Ned Prays dekabrın 2-də mətbuat üçün brifinqdə bildirib.

O xatırladıb ki, Ermənistan və Azərbaycanın xarici işlər nazirləri sonuncu görüşdə danışıqları sürətləndirmək və yaxın həftələrdə yeni görüş təşkil etmək barədə razılığa gəliblər. "Hər ikisi nazirlərin bu görüşünün təşkili üçün Amerikaya minnətdarlıqlarını bildiriblər", deyə o xatırladıb.

Bu yaxınlarda Fransa prezidentinin Vaşinqtona səfəri zamanı Qarabağ müharibəsi mövzusu müzakirə olunubmu və dekabrın 7-də nəzərdə tutulan Əliyev-Paşinyan görüşü ləğv edildikdən sonra ABŞ Brüsseli əvəz etməyə hazırdırmı? Turan-ın müxbirinin bu sualına cavabda Prays deyib ki, bu suala Ağ Ev cavab verə bilər, Ermənistan və Azərbaycan arasında istənilən potensial müzakirə ilə bağlı Ağ Ev fikir bildirə bilər.

"Amma, bildiyiniz kimi, Birləşmiş Ştatlar Cənubi Qafqaz regionu üçün dinc gələcəyi təmin etməyə kömək etmək üçün tərəflərlə fəal şəkildə əlaqə saxlayır", deyə o, əlavə edib.

"Dövlət katibi Blinken artıq Ermənistan və Azərbaycan arasında iki üçtərəfli görüş keçirib. O, həmçinin tərəflərlə telefon əlaqəsi saxlamağa davam edir", deyə Prays xatırladıb.

Bundan başqa, noyabrın 7-də Blinken xarici işlər nazirləri Bakıda Ceyhun Bayramov və Ararat Mirzoyanı qəbul edib, burada nazirlər hərtərəfli və möhkəm sülh haqqında danışıqları sürətləndirmək barədə razılığa gəliblər. 0