ABŞ Azərbaycanla Ermənistan arasında qarşılıqlı fəaliyyətin davam etməsini "alqışlayır"

Vaşinqton/09.05.23/ Turan: ABŞ Azərbaycan və Ermənistanın sülh müzakirələrində iştirakı davam etdirməsi barədə xəbərləri “alqışlayır”, - bazar ertəsi Dövlət Departamenti prezident İlham Əliyevlə Nikol Paşinyanın Brüsseldə keçiriləcək görüşünə dair məlumatdan sonra bildirib.

"Biz bir daha əmin olduğumuzu bildiririk ki, sülh yaxındır və birbaşa dialoq problemlərin həlli və davamlı sülhə nail olmaq üçün açardır", - brifinqdə Dövlət Departamentinin mətbuat katibinin müavini Vedant Patel mayın 14-də Brüsseldə Avropa İttifaqı Şurasının prezidenti Şarl Mişelin Azərbaycan və Ermənistan liderlərilə keçiriləcək üçtərəfli görüşünü Turan-ın müxbirinin xahişilə şərh edərkən deyib.

Görüş ötən həftə Vaşinqtonda aparılan danışıqlardan sonra baş tutacaq, o zaman dövlət katibi Entoni Blinken dönüşün mümkün olduğunu bildirmişdi.

"Bizim mövqeyimiz belədir ki, ötən həftə müzakirələr konstruktiv olub və hesab edirik ki, Ermənistan və Azərbaycan nümayəndə heyətləri mürəkkəb məsələlərin həllində əhəmiyyətli irəliləyişə nail olublar. Məlum olduğu kimi, hər iki ölkə prinsipcə müəyyən şərtlərə razılaşıb və bir - birini daha yaxşı başa düşürlər",- Patel deyib. 0