ABŞ Azərbaycanlıları şəhid ailələrinə yardım üçün xeyriyyə fondu yaradıblar

Nyu-York/26.05.21/Turan: ABŞ-da United Charities for Azerbaijan (UCA) fondu fəaliyyətə başladığını elan edib. Fond Birləşmiş Ştatlarda, Vaşinqton ərazisində yaşayan bir qrup peşəkar azərbaycanlının təşəbbüsü ilə təsis olunub. Adı “Azərbaycan üçün xeyriyyə birliyi” kimi tərcümə olunan qurum İkinci Qarabağ müharibəsində şəhid olmuş əsgərlərin ailələrinə, qazilərə və ailələrinə, döyüş zonası və ətrafında həlak olmuş dinc sakinlərin ailələrinə humanitar yardım məqsədilə yaradılıb.

“Təşkilat nə Birləşmiş Ştatlarda, nə də Azərbaycanda heç bir siyası fəaliyyətlə məşgul olmur”, deyə qurumun press-relizində vurğulanır.

Fond Azərbaycan icmasının vahid humanitar məqsədlər atrafında birliyinə nail olmaq məqsədi daşıyır.

Fondun təşəbbüs qrupunun ilk toplantısı hələ 5 dekabr 2020-ci ildə Virciniya ştatında keçirilib.

Azərbaycan icmasının hər bir üzvü, eləcə də istənilən ABŞ vətəndaşı siyasi əqidəsindən, dini etiqadından, milliyətindən, irqindən və cinsindən asili olmayaraq UCA-nın üzvü ola bilər, rəhbər orqanlarına seçilə bilər.

Fondun maliyyələşməsi ancaq vətəndaşların və müxtəlif təşkilatların ianəsi hesabına həyata keçirilir. Siyasi məqsədli ianələr qəbul edilmir.

UCA Birləşmiş Ştatların müxtəlif məkanlarında müxtəlif Azərbaycan icması nümayəndələri ilə koordinasiya məqsədiylə əlaqə saxlayıb. Təşkilat fəaliyyətini ancaq konkret layihələr üzərində qurur və konkret layihələr üçün ianə toplayır.

“Fondun fəaliyyəti, layihələri, proqramları, bank hesabı şəffafdır və istənilən ictimai nəzarətə acıqdır”, deyə məlumatda bildirilir.

Fondun hər illik fəaliyyəti 3-cü tərəf audit şirkəti tərəfindən yoxlanılaraq ictimaiyyətə açıqlanacaq.

Fondun fəaliyyəti, layıhələri və rəhbər orqanları ilə bağlı məlumatı saytından və Facebook səhifəsindən əldə etmək olar.

Fondun prezidenti vəzifəsinə sahibkar Gündüz Tahirli seçilib. İdarə Heyətinə iqtisadçı Fərid Talışlı, Corc Vaşinqton Universitetinin siyasət və idarəetmə sahəsində doktorantı Sevinc Məmmədova, “Amerikanın azərbaycanlı qadınları” qeyri-kommersiya təşkilatının prezidenti Lalə Rəhimova, ABŞ-ın immiqrasiya hüququ sahəsində hüquqşünas Aynur Cəfər və sahibkar Mahir İsgəndər daxil olublar.

Fondun hüquqi məsləhətçisi İsmayıl Şahtaxtinskidir. -06В-