ABŞ bildirir ki, dünyada korrupsiyaya qarşı mübarizə diplomatiyanın ön planına çıxır

Vaşinqton/26.08.22/Turan: Bayden administrasiyası antikorrupsiya mesajlarının və hərəkətlərinin “onun bütün dünyadakı tərəfdaşları və müttəfiqləri, hətta düşmənlərilə əlaqələrinin mərkəzi hissəsinə çevrilməsinə” can atır. Bu barədə cümə axşamı Dövlət Departamentinin korrupsiyaya qarşı mübarizə üzrə koordinatoru Riçard Nevyu bildirib, Turan-ın Amerika  müxbiri məlumat verib.

Avtokratların hakimiyyətinin güclənməsi fonunda ABŞ administrasiyasının əsas siyasi məqsədi qlobal korrupsiyanın kökünü kəsmək olub.

"Biz antikorrupsiya işini bütün xarici siyasi əlaqələrimizə daxil edirik",- iki aydır ki, yeni vəzifəni tutan Nevyu deyib. Bundan öncə o, İran üzrə xüsusi nümayəndənin müavini olub, Obama administrasiyasında isə sanksiyalar və İranın nüvə sövdələşməsi üzrə ekspert kimi çalışıb.

Bu ilin dekabrında ABŞ Transparency İnternational təşkilatı ilə birlikdə beynəlxalq konfrans keçirəcək. Konfransa dünya antikorrupsiya birliyi toplaşacaq. Tədbir bütün dünyada vətəndaş cəmiyyəti və hökumət tərəfdaşları üçün açıq olacaq, Nevyu deyib.

Gələn il Bayden administrasiyası bir sıra beynəlxalq və ikitərəfli müşavirələrə ev sahibliyi edəcək, 2023-cü ilin birinci yarısında isə ikinci Demokratiya Sammiti keçiriləcək.

Xaricdə korrupsiya ilə mübarizə üçün ABŞ-ın istifadə edəcəyi digər vasitələr barədə suala cavab olaraq Nevyu deyib ki, bu, konkret ölkədən, korrupsiya ilə bağlı spesifik vəziyyətdən və hökumətin mövqeyindən asılı olacaq.

Vaşinqton həmçinin “Qlobal Maqnitski proqramı” və digər maliyyə və viza sanksiyaları vasitəsilə korrupsionerləri məsuliyyətə cəlb etməyə davam edəcək. 0