ABŞ-ın dəstəyilə Azərbaycanda mina təmizləyənlər üçün təlimlərə başlanılıb

Bakı/16.06.23/Turan: ABŞ Dövlət Departamentinin maliyyə dəstəyilə Azərbaycanda sapyorlar üçün təlimlərə başlanılıb.

Regional sülhə və əməkdaşlığa töhfə məqsədilə ABŞ Azərbaycan Minatəmizləmə Agentliyi, Minalar üzrə Məşvərət Qrupu və "Avrasiya" Beynəlxalq Mətbuat Fondu ilə əməkdaşlıq şəraitində  14 nəfərdən ibarət dörd sapyor qrupunun hazırlanmasına və təchiz edilməsinə başlayıb. Bu barədə ABŞ-ın Bakıdakı səfirliyinin məlumatında deyilir.

İki qrupun maliyyələşdirilməsini ABŞ Dövlət Departamenti həyata keçirəcək.

Bu, ABŞ-ın Azərbaycanda humanitar minatəmizləmə əməliyyatlarına dəstəyinin davamıdır.

Minatəmizləmə Agentliyini və onun komandasını dəstəkləyən azərbaycanlı və beynəlxalq tərəfdaşlarla işləmək ABŞ üçün böyük şərəfdir, məlumatda deyilir.

"Mən bu gün azərbaycanlı sapyor kimi xidmət etmək üçün təlimlərə başlayacaq bu cəsarətli azərbaycanlı qadınlara və kişilərə heyranam və onlara hörmət edirəm", - ABŞ - ın Bakıdakı səfirliyinin siyasi müşaviri Filip Tişu təlimlərin açılışında çıxış edərkən deyib.

Minalar üzrə Məsləhət Qrupunun ölkə üzrə direktoru Canet Deykstra bildirib ki, yeni komandalar minaların təmizlənməsi üzrə qadın komandalarının yaradılması və minalardan təmizləmə üzrə qarışıq komandalara qadınların qoşulması yoluyla gender bərabərliyini təşviq edəcək. Qrup həmçinin qeyri-hökumət təşkilatlarının Azərbaycanda minalardan təmizləmə üzrə humanitar işlərdə iştirakını genişləndirməyə çalışır. "Minalardan təmizləmə sahəsində Azərbaycanın institusional potensialını gücləndirmək və artırmaq üçün ANAMA ilə işləməyə davam edəcəyik", - Deykstra qeyd edib.

2021-ci ilin noyabrında elan edilmiş 500 000 ABŞ dolları və 2022-ci ilin sentyabrında elan edilmiş  2 000 000  ABŞ dolları məbləğində maliyyə dəstəyilə  ABŞ-ın bu təşəbbüsü ölümcül yerüstü minaların və partlamamış hərbi sursatların zərərsizləşdirilməsi üçün minalardan təmizləmə təşkilatlarının texniki imkanlarını möhkəmləndirəcək. Sadalanan işlər insan təhlükəsizliyinin möhkəmləndirilməsində və məcburi köçkünlərin öz evlərinə qayıtması və öz həyatlarını təhlükəsiz şəkildə bərpa etməsi imkanlarının təmin edilməsində mühüm rol oynayır.

Amerika Birləşmiş Ştatları 1993-cü ildən 120-dən çox ölkədə  minalarınd təmizlənməsi yoluyla beynəlxalq sülh və təhlükəsizliyin möhkəmləndirilməsinə 4,6 milyondan çox investisiya qoyaraq dünyada adi silahların məhv edilməsinin ən böyük maliyyə tərəfdarıdır. 16D