ABŞ-ın yeni hesabatı: Rusiya ukraynalıları onun vətəndaşlığını qəbul etməyə məcbur edir

Vaşinqton/03.08.23/Turan: Rusiyanın işğal etdiyi ərazilərdə yaşayan ukraynalılar Rusiya vətəndaşlığını qəbul etməyə məcbur edilir,  ya da onları deportasiya və ya həbs təhlükəsi gözləyir, Dövlət Departamentinin Conflict Observatory proqramının yeni hesabatında deyilir, Turan-ın Vaşinqton müxbiri bildirib.

Yale Universitetinin tədqiqatçıları müəyyən ediblər ki, Luqansk, Donetsk, Xerson və Zaporojye vilayətlərinin sakinləri sistematik təzyiqlərə məruz qalırlar, məqsəd onları Ukrayna kimliyindən məhrum etməkdir. Bundan imtina edənlər dövlət xidmətlərinə, məşğulluğa və mülkiyyətə məhdud çıxışla üzləşirlər.

Hesabata görə, valideynlər daha ciddi problemlərlə üzləşirlər, çünki Ukraynanın işğal olunmuş ərazilərində doğulan uşaqlar ciddi problemlərə məruz qalırlar. Belə ki, övladlarının Rusiya vətəndaşlığını qəbul etməsindən imtina edən valideynlər müavinətlərin əldə olunması zamanı məhdudiyyətlərlə üzləşirlər. Bəzi valideynlər uşaqlara qəyyumluqdan məhrum edilməklə və Rusiyaya deportasiya edilməklə təhdid olunur.

Çərşənbə günü Dövlət Departamenti bildirib ki, məcburi pasportlaşdırılma Kremlə Ukraynadakı öz vətəndaşlarını qorumaq üçün bəhanə verir.

"Bu, Rusiyanın Gürcüstanın işğal olunmuş ərazilərində istifadə etdiyi uzunmüddətli taktikadır",- mətbuat katibi Metyü Miller gündəlik brifinqdə bildirib.

Turan-ın “Moskvanın hərəkətlərini soyqırım kimi tövsif etmək olarmı?” sualının cavabında Miller deyib ki, ABŞ Rusiyanın törətdiyi vəhşilikləri "çox aydın şəkildə" bəyan edib. "Biz çox aydın şəkildə bildirdik ki, Rusiyanın hərəkətlərinə görə hesabatlılıq, beynəlxalq mexanizmlər vasitəsilə hesabatlılıq olmalıdır".

Ötən həftə ABŞ bəyan edib ki, Rusiyanın hərbi cinayətlərinə dair sübutları Beynəlxalq Cinayət Məhkəməsinə təqdim edəcək. 0