ABŞ İranda müxalifətçilərə qarşı ölüm hökmlərini pisləyir

Çərşənbə günü ABŞ İran İnqilab Məhkəməsinin İranlı tanınmış reperi Tumac Salehinin barəsində ölüm hökmünü pisləyib. O, İrandakı iğtişaşlarda əli olmaqda ittiham olunur.

"Biz İran rejiminin ölüm hökmündən insan hüquqlarının və  əsas azadlıqlarının yatırılması vasitəsi kimi istifadə etməsini bir daha pisləyirik. Biz cənab Salehinin vəziyyəti barədə xəbərləri diqqətlə izləməyə davam edirik",- Dövlət Departamentinin rəsmi nümayəndəsinin müavini Vedant Patel brifinqdə Turan-ın suallarını cavablandırarkən bildirib.

33 yaşlı Salehi 2022-ci ilin oktyabrında, hicabı "düzgün" taxmamaq ittihamı ilə həbs olunan 22 yaşlı iranlı qadın Məhsa Əmininin polisdə ölümündən qaynaqlanan ümummilli etirazlara ictimai dəstəkdən sonra həbs olunub.

2023-cü ilin sonunda, zaminə buraxıldıqdan iki həftə sonra Salehi yenidən tutulub və altı il, üç ay müddətinə həbs edilib, lakin Ali Məhkəmənin qərarı sayəsində ölüm hökmünə məruz qalmayıb.

Çərşənbə günü onun vəkili Əmir Raisyan bildirib ki, İsfahan İnqilab Məhkəməsi Ali Məhkəmənin əvvəlki qərarına məhəl qoymadan "korrupsiya" ilə bağlı yeni ittiham üzrə ölüm hökmü çıxarıb.

"Biz bu həyəcanlı məlumatları gördük", - Patel deyib. "Biz həbsxanada işgəncə və digər amansız rəftarla üzləşmiş bir adamdan danışırıq. Bu, İran rejiminin dəhşətli və geniş yayılmış insan haqları pozuntularına daha bir nümunədir".

Çərşənbə günü ABŞ prezidenti Co Bayden Konqres tərəfindən qəbul edilmiş milli təhlükəsizlik haqqında qanunu imzalayıb. Qanun Tehranın insan hüquqlarını pozmasına görə İrana qarşı yeni sanksiyaları əhatə edib.

Turan-ın “Administrasiya yeni qanunu necə həyata keçirəcək və onlar İranın ali liderini birbaşa təqib etməyə hazırdırmı?” sualının cavabında Patel birbaşa cavabdan yayınıb. O deyib ki, "bizim sərəncamımızda İran rejimini məsuliyyətə cəlb etməyə imkan verən bir sıra vasitələr var".