ABŞ Moldovada vəziyyəti "diqqətlə izləyir" və onun suverenliyini dəstəkləyir

Çərşənbə günü ABŞ bildirib ki, Moldovadakı hadisələri "diqqətlə izləyir" və qondarma Dnestryanı "parlamenti" müdafiə üçün Moskvaya müraciət etdikdən sonra ölkənin suverenliyini dəstəkləyir, Turan-ın Vaşinqton müxbiri bildirib.

"Birləşmiş Ştatlar Moldovanın suverenliyini beynəlxalq səviyyədə tanınmış sərhədləri daxilində ərazi bütövlüyünü qətiyyətlə dəstəkləyir",- Dövlət Departamentinin rəsmi nümayəndəsi Metyü Miller brifinqdə bildirib.

"Rusiyanın Avropada getdikcə daha aqressiv və sabitliyi pozan rolunu nəzərə alaraq, Rusiyanın Dnestryanıdakı hərəkətlərini və daha geniş vəziyyəti çox diqqətlə izləyirik", - o deyib.

Rusiya Moldovada belə cəsarətlə hərəkət edir, çünki Qərb Ukraynanın maliyyələşdirilməsini gecikdirir?

Turan-ın bu sualına cavabda Miller deyib: “Biz Rusiyanın regionda bir sıra inanılmaz ağılsız və sabitliyi pozan hərəkətlərə yol verdiyini gördük. Bu, yeni bir şey deyil, səbəb məhz onun düşüncəsizliyindədir”.

Çərşənbə günü Albaniyada Cənub-Şərqi Avropa ölkələrinin sammitində olan Moldova prezidenti Maya Sandu bildirib ki,  onun ölkəsi əvvəlkitək Dnestryanı münaqişəsinin sülh yolu ilə həllinə sadiqdir.

"Bu gün hökumətin etdiyi şey ölkənin iqtisadi reinteqrasiyası üçün kiçik addımlardır", - o  deyib.

Ukrayna prezidenti Vladimir Zelenski sosial şəbəkələrdə qeyd edib ki, o və Sandu sammitdə görüşərək "Dnestryanıda son hadisələri və Rusiyanın bölgədəki vəziyyəti sabitləşdirmək səylərini" müzakirə ediblər.

Kiyev bildirib ki, Dnestryanı nizamlanması prosesinin fəal iştirakçısı olaraq "qalacaq". O,  "Rusiya qoşunlarının tezliklə çıxarılmasına" çağırıb.