ABŞ RF-də yeni oliqarxlar qrupuna qarşı sanksiyalar tətbiq edib

Bakı/06.04.18/Turan: Oliqarxlar Miller, Rotenberq və Deripaska, DİN başçısı Kolokoltsev, Rosqvardiya və Roskomnadzor rəhbərləri - onların hamısının adı əvvəlcə "Kreml məruzəsi"nə düşüb, indi isə sanksiyalara məruz qalıblar.

ABŞ "Kreml məruzəsi"nə də adı düşmüş Rusiyanın 24 biznesmen və məmuruna qarşı sanksiyalar tətbiq edib. Bu barədə məlumat cümə günü, aprelin 6-da ABŞ Maliyyə Nazirliyinin saytında yerləşdirilib. 14 şirkətə qarşı da məhdudlaşdırıcı tədbirlər görülüb.

Sanksiyalara məruz qalanlar arasında Vladimir Putinin əhatəsinə daxil olan Rusiyanın ən nüfuzlu oliqarxları - Aleksey Miller, İqor Rotenberq, Oleq Deripaska və Süleyman Kərimov, habelə KİV-in Rusiya prezidentinin kürəkəni olduğunu bildirdiyi Kirill Şamalov var. Bir qrup yüksək vəzifəli məmurlara: daxili işlər naziri Vladimir Kolokoltsevə, Rosqvardiya rəhbəri Viktor Zolotova, Roskomnadzor rəhbəri Aleksandr Jarova və Tulsk vilayətinin qubernatoru Aleksey Dyuminə qarşı da məhdudlaşdırıcı tədbirlər tətbiq edilib.

ABŞ Maliyyə Nazirliyi 2018-ci ilin yanvarında 210 addan ibarət "Kreml siyahısı"nı dərc edib. Siyahıya 1 milyard dollardan artıq var-dövləti olan bütün Rusiya biznesmenləri, həmçinin 114 məmur daxil edilib. Həmin vaxt ABŞ administrasiyası hələlik siyahıdakı fiqurantlara qarşı məhdudlaşdırıcı tədbirlər görməmək qərarını açıqlamışdı.

Sanksiyalar bu şəxslərin ABŞ-a girişinin qadağan edilməsini,hesablarının və daşınmaz əmlaklarının dondurulmasını nəzərdə tutur. -02D-