Fuad Rzayev: Müharibə əlillərinin sosial durumu ürəkaçan deyil

Bakı/06.04.18/Turan: Bakı Müharibə Əlil və Veteranları İctimai Birliyinin sədri Fuad Rzayev müharibə veteranları və əlillərinin sosial durumu barədə danışıb.

Sual: Azərbaycan Respublikasında nə qədər müharibə veteranı var? Onların sosial durumu necədir?

​Cavab: Azərbaycan Respublikasında bu gün rəsmi olaraq 70 min civarında Qarabağ müharibəsi veteranı var. Amma, mən lap açıq danışım ki, bu 70 min veterandan əslində təxminən yarısı saxta veteranlardır. Yəni heç bir döyüşdə olmamış veteranlardır. Ümumiyyətlə, vətən uğrunda canını qoymuş, vuruşmuş, çox döyüşlərdə iştirak etmiş veteranların durumu yaxşı deyil. Yumşaq desək, yaxşı deyil.

Sual: Hökumətin qayğısı necədir? Onlara sosial yardımlar, pensiyalar verilirmi?

Cavab: Pensiyalar Qarabağ əlillərinə verilir.Veteranlara isə 55 manat müavinət verilir. Veteranla ümumiyyətlə hər hansı imtiyaz nəzərdə tutulmayıb. Onlara yalnız kommunnal ödənişləri kompensasiya etmək üçün 55 manat vəsait verilir.

Sual: Ölkədə müharibə əlillərinin sayı nə qədərdir? Onlara nə qədər müavinat verilir?

​​Cavab: Azərbaycanda 12 mindən bir az çox müharibə əlili var. Üç qrup müharibə əlilləri (1-ci, 2-ci, 3-cü qrup) var. Orta rəqəmi götürək. İkinci qrup Qarabağ müharibəsi əlili dövlətdən 165 manat (bu il 10 faiz artırılıb) alır. Bundan əlavə, isə 143 manat prezident təqaüdü verilir. İkisini birləşdirəndə ayda 325-330 manat edir.

Sual: Bu pensiyalar əlillərin sosial ehtiyaclarını qarşılaya bilirmi?

Cavab: Yox. Təbii ki, sosial ehtiyacları qarşılaya bilmir. 330 manatla sosial ehtiyacını qarşılayır, ailəsini, özünü dolandırır desəm, bu, lətifəyə oxşayar, gülməli çıxar. Çox çətindir. Hansısa Qarabağ əlillərinə şirkətlər yardım edir. Bizim təşkilatda da çoxsaylı Qarabağ əlilləri var. Onlarla bağlı da şirkətlərə müraciət etmişik. Onların da bəzilərinə yardımlar ayrılıb. Bəzilərinə hansısa şəkildə yardım edirlər. Qarabağ əlilləri vəziyyətdən belə çıxır.

Sual: Durumun yaxşılaşdırılması üçün hökumətə nələri təklif edərdiniz?

​​Cavab: Hökumətə, Nazirlər Kabinetinə dəfələrlə təkliflər paketi təqdim etmişik. Amma, hələ ki, cavab verməyiblər. Müharibə əlillərinin vəziyyətinin yaxşılaşdırılması üçün çox təkliflər vermişik. Biri elə odur ki, müharibə əlillərinin sıralarında təxminən 3 minə yaxın saxta əlil var. Bunu da onlara dövlətin əlilliklə məşğul olan orqanları verir. Heç vaxt müharibədə olmayan, heç bir yara almayan minlərlə insan var ki, Qarabağ əlili statusu verilib. Məncə, ən azı onların təqaüdləri kəsilib, həqiqi müharibə əlillərinə veriilməlidir. Ona da inanmıram. Bir də deyirəm, müharibə əlillərinin vəziyyəti ürəkaçan deyil. -03B-