ABŞ Suxumi aeroportunun Rusiyaya verilməsini pisləyir və Moskvanı öz öhdəliklərini yerinə yetirməyə çağırır

Vaşinqton, D.C./01.08.23/Turan: Çərşənbə axşamı ABŞ Dövlət Departamenti Abxaziyanın - Gürcüstanın işğal edilmiş regionu- strateji obyekt olan Suxumi aeroportunun Rusiyaya verilməsi qərarına münasibət bildirib.

"Birləşmiş Ştatlar Suxumi aeroportunu Gürcüstanın hava məkanının bir hissəsi hesab edir", - rəsmi nümayəndə Metyü Miller Turan-ın Vaşinqton müxbirinə bildirib.

Millerin sözlərinə görə, Birləşmiş Ştatlar Gürcüstanın beynəlxalq səviyyədə tanınmış sərhədləri daxilində onun suverenliyini və ərazi bütövlüyünü dəstəkləməyə davam edir.

"Biz Rusiyanı 2008-ci ildə Avropa İttifaqının vasitəçiliyilə əldə edilmiş atəşkəs haqda razılaşmaya uyğun olaraq öz qoşunlarını münaqişədən əvvəlki mövqelərə çıxarmaq öhdəliyini yerinə yetirməyə çağırırıq", - o əlavə edib.

Ötən həftə Gürcüstan prezidenti Salome Zurabişvili müvəqqəti işğal olunmuş Abxaziyanın qondarma "parlamenti"nin Suxumi aeroportunun Rusiyaya verilməsi barədə qərarını pisləyib və bu addımı "Rusiyanın qanunsuz hərəkəti" adlandırıb ki, beynəlxalq ictimaiyyət buna qəti və sərt reaksiya verməlidir. 0