ABŞ Ukraynaya daha çox raket sistemi göndərəcək

Vaşinqton/02.07.22/Turan: Cümə günü Pentaqon Ukrayna üçün növbəti, 820 milyon dollarlıq silah paketini açıqlayıb. Paketə bir neçə ədəd daha təkmil RƏM sistemi də daxildir, xəbəri Turan-ın Vaşinqtondakı müxbiri verib.

770 milyon ABŞ dolları dəyərində yardım Pentaqona istehsalçılardan silah almaq imkanı verən Ukrayna Təhlükəsizliyinə Yardım Təşəbbüsü çərçivəsində təqdim ediləcək. Qalan 50 milyon dollar ABŞ ordusunun ehtiyatında olan silahlara xərclənəcək, deyə Pentaqonun nümayəndəsi Todd Bresseyl bildirib.

Təkcə keçən həftə ABŞ Ukraynaya 450 milyon dollar dəyərində silah, o cümlədən dörd raket komleksi (HİMARS) və patrul qayıqları göndərib.

Rusiya təcavüzünün başlanğıcından etibarən ABŞ-ın Ukraynaya hərbi yardımının ümumi məbləği 6,9 milyard dollara çatıb.

Ukrayna Təhlükəsizliyinə Yardım Təşəbbüsü çərçivəsində Pentaqon Ukraynaya iki qabaqcıl zenit-raket sistemi, 150 000-ə qədər artilleriya mərmisi və dörd artilleriya əleyhinə radar da təqdim edəcək.

Cümə günü jurnalistlər qarşısında çıxış edən Pentaqon nümayəndəsi bildirib ki, HİMARS-ların təqdim edilməsi ukraynalıların Rusiya komanda məntəqələrini vurmaqda "yaxşı nəticələr əldə etməsinə" imkan verib. 0