ABŞ və Azərbaycan Birləşmiş Millətlər Təşkilatı Baş Assambleyasının qarşıdakı sessiyasını “gələcək sülh prosesi üçün imkan” adlandırırlar

Vaşinqton/07.09.22/Turan: Sentyabrın 6-da Amerikanın Avropa və Avrasiya üzrə yüksək vəzifəli diplomatı Azərbaycanın xarici işlər nazirilə Azərbaycan və Ermənistan arasında sülh prosesini müzakirə edib.

Dövlət katibinin köməkçisi Karen Donfrid və xarici işlər naziri Ceyhun Bayramov “avqustun 31-də Brüsseldə keçirilmiş prezident Əliyevlə baş nazir Paşinyanın görüşünü müzakirə ediblər”, -çərşənbə axşamı Dövlət Departamentinin nümayəndəsi Turan-ın Vaşinqton müxbirinə bildirib.

“Dövlət katibinin köməkçisi Azərbaycanla Ermənistan arasında sülh prosesinə və Avropa İttifaqının səylərinə bizim qətiyyətli dəstəyimizi vurğuladı”, -  məmur deyib.

Donfrid Bayramova bildirib ki, Qafqaz danışıqları üzrə baş müşavir, səfir Fil Riker tezliklə məsləhətləşmələr üçün regiona gedəcək.

“Onlar Birləşmiş Millətlər Təşkilatı Baş Assambleyasının Nyu-Yorkda qarşıdakı iclasını sülh prosesinin irəliləməsi üçün fürsət kimi göstərdilər”, - Dövlət Departamentinin nümayəndəsi əlavə edib.

Qeyd edək ki, gələn həftə Birləşmiş Millətlər Təşkilatı Baş Assambleyasının 77-ci sessiyası açılacaq. Yüksək səviyyədə ümumi müzakirələrin ilk günü çərşənbə axşamı, sentyabrın 20-də olacaq. 25B