ABŞ və Böyük Britaniya səfirliklərinin Tofiq Yaqublunun həbsi ilə bağlı şərhi

Bakı/04.09.20/Turan: “Tofiq Yaqublunun sentyabrın 3-də saxta görünən ittihamlar əsasında azadlıqdan məhrum edilməsi Amerika Birləşmiş Ştatlarının Səfirliyini məyus etmişdir”. Bu barədə ABŞ-ın Azərbaycandakı Səfirliyinin məlumatında deyilir.

“Yaqublu həbs və məhkəmə zamanı ədalətli məhkəmə prosesinin çoxsaylı elementlərindən bəhrələnmək imkanından məhrum olunmuşdur. Biz Azərbaycan hökumətini son zamanlar yer alan siyasi həbslər tendensiyasından daşınmağa, cənab Yaqublunun ışınə yenidən baxmağa və Azərbaycanın Konstitusiyası ilə təmin olunan əsas söz və toplaşma azadlıqlarına hörmətlə yanaşmağa çağırırıq”, deyə səfirliyin press-relizində bildirilir.

Öz növbəsində, Böyük Britaniyanın səfirliyi Tofiq Yaqublunun 4 il 3 ay müddətinə həbs cəzasına məhkum edilməsindən narahatlığını bildirib.

Səfirlik Yaqublunun 2014-cü ildə də həbs cəzası aldığında ona qarşı irəli sürülən ittihamların siyasi motivli olduğuna dair ciddi narahatlıqlar olduğunu və Yaqubluya verilən hökmün daha sonra Avropa İnsan Hüquqları Məhkəməsi tərəfindən qanunsuz hesab edildiyini xatırladır.

“Böyük Britaniyanın cənab Yaqublunun son həbs cəzasına dair də bənzər narahatlıqları var və hakimiyyəti onun işinə təcili olaraq yenidən baxmağa çağırır. Son zamanlar İlqar Məmmədovun işi və REAL-ın qeydiyyatı ilə bağlı çoxdan gözlənilən irəliləyişi nəzərə alaraq bu hadisələr məyusedicidir”, deyə Böyük Britaniya səfirliyi qeyd edir. -02D-