ABŞ Venesuelada seçkilərin nəticələri barədə

Bazar ertəsi Bayden administrasiyası Venesuela seçki orqanını ölkənin avtoritar lideri Nikolas Maduronun seçkilərdə qalib gəlməsi barədə ətraflı məlumat dərc etməyə çağırıb.

Maduro rejiminin nəzarətində olan Venesuela Milli Seçki Şurası səsvermənin nəticələrini saxtalaşdıraraq bildirib ki, 51 faiz səs toplayaraq müxalifətçi namizəd Edmindo Gonsalesə (44 faiz) qalib gəlib. Baxmayaraq ki, exit-pol müxalifətin qələbəsini göstərib.

Argentina, Uruqvay, Kosta- Rika, Panama və digər ölkələrin liderləri nəticələri açıq şəkildə rədd ediblər, Rusiya, Çin, İran, Kuba, həmçinin Azərbaycan Maduronu təbrik etməyə tələsiblər.

 “Elan edilən nəticələrin Venesuela xalqının iradəsini və ya səsini əks etdirməməsilə bağlı ciddi narahatlığımız var", -  Tokioda dövlət katibi Entoni Blinken bildirib.

"Hər bir səsin dürüst və şəffaf sayılması, seçkilərə məsul olan vəzifəli şəxslərin dərhal və gecikmədən məlumatları müxalifət və müstəqil müşahidəçilərlə paylaşması çox vacibdir", - Dövlət Departamentinin nümayəndəsi  deyib.

Turan-ın müxbirinin “ABŞ seçkilərin saxtalaşdırıldığını hesab edirmi?” sualının cavabında  Dövlət Departamentinin mətbuat katibinin müavini Vedant Patel deyib: "Biz məhz bunu aydınlaşdırmaq istəyirik. Məhz buna görə dövlət katibi səslərin ətraflı cədvəlini dərc etməyə çağırıb".

Maduronun digər avtoritar liderlərdən aldığı təbriklər barədə sualın cavabında  Patel deyib: "Mən həmin hökumətlərin nümayəndəsi deyiləm, amma biz bu nəticələrdən və onların Venesuela xalqının iradəsini əks etdirməməsindən ciddi narahatıq".