Ağalarovlar ABŞ məhkəməsindən seçkilərə müdaxilə haqqında iddianı təmin etməməyi xahiş edib

Bakı/07.12.18/Turan: Rusiya-Azərbaycan müğənnisi Emin Ağalarov və onun atası biznesmen Araz Ağalarov ABŞ-dakı məhkəmədən Demokrat Partiyasının Milli Komitəsinin onların Amerikadakı seçkilərə müdaxilədə əli olması haqqında ittihamlarını təmin etməməyi xahiş edib, xəbəri Bloomberg yayıb.

Bəyanatda qeyd edilir ki, Ağalarovlar heç bir şəkildə Demokratk Partiyasının kompüter fayllarının sındırılması məqsədilə heç bir siyasi sövdələşmədə iştirak etməyib və belə bir sövdələşmədən xəbəri olmayıb.

Ağalarovlar hesab edirlər ki, Demokrat Partiyası onları Respublikaçılar Partiyasından prezidentliyə namizədliyi irəli sürülmüş Donald Trampla, onun seçki qərargahının üzvləri ilə əlaqələri olduğuna görə onları seçkilərə ehtimal olunan müdaxilə ilə əlaqələndirir.

Emin Ağalarov Trampın seçkiqabağı qərargahının üzvlərinin 2016-cı ilin iyununda Nyu-Yorkda Trump Tower göydələnində Rusiyalı vəkil Natalya Veselinskaya ilə görüşünü təşkil etməyə kömək edib. Ağalarovların vəsatətində qeyd edilir ki, görüş ictimai xarakter daşıyıb və xaker hücumlarının və ya digər qanunsuz fəaliyyətin təşkili ilə əlaqəsi olmayıb.

Amerikanın xüsusi xidmətləri Rusiyanın 2016-cı ildə ABŞ-da prezident seçkilərinə müdaxilə etməsindən şübhələnir. Onların məlumatına görə, Rusiya xakerləri Demokrat Partiyasının məlumatlar bazasını sındırmağa çalışıb. -02D-