Aİ-nin Azərbaycan nümayəndəliyi yeni saytın təqdimatını keçirib

Bakı/18.02.21/Turan: Avropa İttifaqının Azərbaycandakı nümayəndəliyi cümə axşamı yeni eu4Azerbaijan.eu saytının təqdimatını keçirib. Saytda Aİ-nin Azərbaycanda həyata keçirdiyi layihələr əks olunub.

Videokonfrans formatında keçirilən təqdimatda nümayəndəliyin rəhbəri Kəstutis Yankauskas bildirib ki, saytda 120-dən çox reallaşdırılan layihə təqdim olunub.

O qeyd edib ki, Aİ ilə Azərbaycan arasında əməkdaşlıq strateji xarakter daşıyır və enerji əməkdaşlığı, təhsil, kənd təsərrüfatı, regionlarda ailə təsərrüfatlarının yaradılması da daxil olmaqla, geniş spektri əhatə edir.

Bununla yanaşı səfir Aİ-nin "ASAN xidmət"in yaradılmasında, həmçinin korrupsiyanın aradan qaldırılması üçün rəqəmsal xidmətlərin yaradılmasındakı rolunu vurğulayıb.

“Biz birlikdə işləyərək daha güclü olduğumuza əminik”, - Yankauskas deyib.

Avropa Komissiyası Baş Direktorluğunun nümayəndəsi Eleni Papoutsi qeyd edib ki, bu sayt uğur hekayələrini yaymağa imkan yaradır və Aİ ilə Azərbaycan arasında əməkdaşlıq haqda məlumat verir.

Öz növbəsində layihənin rəhbəri Silviya Qrant hesab edir ki, saytda dərc olunan məlumatlar sadə adamların Aİ layihələrinə cəlb olunduğunu nümayiş etdirir və bu cür layihələrdə fəallığı təşviq edir.

Həmçinin Aİ-nin Azərbaycandakı nümayəndəliyi jurnalistlər üçün Aİ və Azərbaycan arasında əməkdaşlıq mövzusunda müsabiqə elan edib.

Aİ-nin Azərbaycan nümayəndəliyinin əməkdaşlıq şöbəsinin rəhbəri Simona Qatti bildirib ki, jurnalistlər üçün aşağıdakı mövzular seçilib: iqtisadi İnkişaf və bazar imkanları; strukturların gücləndirilməsi və qənaətbəxş idarəetmə; enerji səmərəliliyi, ətraf mühit və iqlim dəyişikliyi; mobillik və insanlar arasında əlaqələr. Müsabiqə aprelin 18-dək davam edəcək.–71D-