Aİ-nin Cənubi Qafqazdakı fəaliyyəti şəffafdır - T.Klaar

Bakı/15.06.23/Turan: "Avropa İttifaqının Cənubi Qafqazda sülh naminə fəaliyyəti tamamilə şəffaf olub və bundan sonra da şəffaf olacaq". Bu barədə Avropa İttifaqının Cənubi Qafqazda və Gürcüstanda böhran üzrə xüsusi nümayəndəsi Toyvo Klaar öz Twitter hesabında yazıb.

"Biz insanların rifahı naminə işi davam etdirəcəyik", deyən Klaar Aİ-nin Ermənistandakı nümayəndəliyinin Aİ-nin müşahidə missiyasının fəaliyyətinə dair məlumatını da bölüşüb. Bu məlumatda deyilir: 

"6 əməliyyat mərkəzi və maksimum 103 nəfərlik ştatı ilə Avropa müşahidə missiyasının iş planı ilk gündən tamamilə şəffaf olub. Biz yaxın gələcəkdə tam iş qabiliyyətinə nail olmağa çalışırıq. Bu, Ermənistan hökumətinin sorğusuna cavab olaraq işə salınmış silahsız mülki missiyadır".

Ermənistanda artıq Aİ müşahidə missiyasının 3 əməliyyat mərkəzi açılıb.

Bu günlərdə missiya rəhbəri bildirib ki, yaxın aylarda Azərbaycanla sərhədin monitorinqi üçün daha üç əməliyyat mərkəzi açılması planlaşdırılır.

Klaarın və Aİ-nin Ermənistandakı nümayəndəliyinin tvitlərindən göründüyü qədər, müşahidə missiyası əvvəlcədən 6 əməliyyat mərkəzi açılmasını planlaşdırırdı.

Bu xatırlatma, çox güman ki, RF XİN-in rəsmi nümayəndəsi Mariya Zaxarovanın 14 iyun tarixində Ermənistanda Aİ müşahidə missiyasının əməliyyat mərkəzlərinin artırılması haqqında məlumata mənfi reaksiya verməsindən sonra yayılıb.

Zaxarovanın fikrincə, "Aİ-nin Cənubi Qafqazdakı siyasətinin əsl məqsədi Rusiyanı Zaqafqaziyadan sıxışdırıb çıxarmaq, regionu geosiyasi qarşıdurma meydanına çevirməkdir". 16В