Aİ-yə üzv dövlətlər qarşıdan gələn qışda qaza olan tələbatı 15% azaltmaq öhdəliyi götürürlər

Bakı/26.07.22/Turan: Aİ-nin enerji təchizatı təhlükəsizliyini artırmaq məqsədilə üzv ölkələr çərşənbə axşamı bu qış könüllü olaraq təbii qaza olan tələbatın 15% azaldılması haqqında siyasi razılıq əldə ediblər. 

Şuranın qərarı İttifaqın tədarükün təhlükəsizliyi haqqında "xəbərdarlıq" etməsi mümkünlüyünü də nəzərdə tutur və bu halda qaza olan tələbatın azaldılması məcburi olacaq.

Qaz tələbatının azaldılmasının məqsədi enerji daşıyıcılarından daim silah kimi istifadə edən Rusiyadan qaz tədarükündə mümkün fasilələrə hazırlaşmaq üçün qış ərəfəsində qaza qənaət etməkdir.

Aİ birlik və həmrəylik içindədir. Bugünki qərar açıq-aşkar göstərib ki, üzv dövlətlər Rusiyanın enerji daşıyıcılarından silah kimi istifadə edərək Aİ-ni parçalamaq cəhdlərinə davam gətirəcəklər. Rekord dərəcədə qısa müddətdə qazın azaldılması təklifinin qəbul edilməsi, şübhəsiz, bizim ümumi enerji təhlükəsizliyimizi möhkəmləndirib. Hazırda qaza qənaət hazırlığı artıracaq. Qış Aİ vətəndaşları və sənayesi üçün daha ucuz və daha asan olacaq, deyə Çexiyanın sənaye və ticarət naziri Yozef Sikela bildirib.

Üzv dövlətlər 1 avqust 2022-ci ildən 31 mart 2023-cü ilə qədərki dövr ərzində son beş ildə orta istehlakla müqayisədə qaza olan tələbatlarını öz seçdikləri tədbirlərlə 15% azaltmağa razılaşıblar. 

Aİ ölkələri tələbatı azaltmaq öhdəliklərini yerinə yetirmək üçün səy göstərərkən Şura üzv dövlətlərdə konkret vəziyyətləri aradan qaldırmaq və Aİ-yə tədarükün etibarlılığının artırılmasında qaza olan tələbatın azalmasının effektivliyini təmin etmək üçün bəzi istisnaları və qaz tələbatının icbari azaldılması məqsədindən kənaraçıxmaların tələb edilməsi imkanlarını müəyyən edib.

Qərar məhdud müddət üçün nəzərdə tutulan müstəsna və fövqəladə tədbirdir. Beləliklə, qərar il ərzində tətbiq ediləcək və Komissiya 2023-cü ilin mayına qədər Aİ-yə qaz tədarükü ilə bağlı ümumi vəziyyət fonunda onun uzadılması məsələsini nəzərdən keçirəcək. 0