AİB Azərbaycana təhsil sahəsində layihə üçün 150 mln. dollar ayırmağı planlaşdırır

Bakı/31.05.22/Turan: Asiya İnkişaf Bankı (AİB) 2022-ci ilin sonuna qədər Azərbaycan hökumətinə peşə təhsilinin inkişafı üzrə layihənin maliyyələşdirilməsi üçün ("Peşə təhsilinin müasirləşdirilməsi və iqtisadiyyatın şaxələndirilməsi üçün təhsil proqramı" - Modernizing Vocational Education and Training for Economic Diversification Sector Development Program) 150 mln. dollar kredit ayrılmasına razılıq verə bilər.

Bu barədə jurnalistlərə AİB-nin Azərbaycandakı ofisinin direktoru Kendis Makdiqan (Candice McDeigan) bildirib.

Maliyyələşdirmə həcminin 120 mln. dolları peşə təhsili sahəsində islahatlara, 30 mln. dolları isə zəruri avadanlığın alınmasına sərf olunacaq.

Azərbaycan hökuməti bu proqram üçün 10 mln. dollar ayıracaq.

Proqramın vəzifələri arasında dördüncü sənaye inqilabı strategiyası əsasında insan kapitalının inkişafı, gender bərabərliyinin təşviqi və Azərbaycanın sabit inkişafı üçün əhəmiyyət kəsb edən digər aspektlər var.

Xatırladaq ki, Azərbaycan 1999-cu ildən AİB-nin üzvüdür və əməkdaşlıq dövrü ərzində bankdan ümumilikdə 5.2 mlrd. dollar məbləğində kredit və qrant alıb.

AİB 1966-cı ildə təsis edilib və 67 iştirakçı ölkəsi var. Bankın qərargah-mənzili Filippinin paytaxtı Manilada yerləşir. –0-