AİHM Nemət Pənahlının hüquqlarının pozulduğunu təsdiq edib

Bakı/20.10.17/Turan: Avropa İnsan Hüquqları Məhkəməsi (AİHM) Azərbaycan Milli Dövlətçilik Partiyasının sədri Nemət Pənahlının hüquqlarının pozulduğunu təsdiq edib.

2011-ci ilin yanvarında Bakıda məhkəmə Azərbaycan CM-in 127.2.3 (ümumi təhlükəli üsulla sağlamlığa az ağır zərər yetirmə, xuliqanlıq niyyəti ilə törədildikdə) və 221.3-cü (xuliqanlıq, silahdan və ya silah kimi istifadə olunan əşyadan istifadə ilə törədildikdə) maddələri ilə Pənahlıya qarşı irəli sürülmüş ittihamlarla əlaqədar onun barəsində 2 ay həbs qətimkan tədbiri seçib. Sonradan məhkəməöncəsi həbs müddəti 1 ay uzadılıb.

Ərizəçi Azərbaycan məhkəmələrinin qərarlarının hüquqazidd olduğunu hesab edərək, həbsə salınmasının qanuni olmamasından AİHM-ə şikayət verib.

AİHM araşdırmaların yekunlarına görə Azərbaycan hüquq mühafizəçilərinin Pənahlını məhkəməyə qədər həbs etmək üçün "sadəcə olaraq saxlama üçün əsasların sadalandığı, ərizəçinin işi ilə bağlı konkret faktlara toxunulmayan standart düsturdan" istifadə etdiyi barədə nəticəyə gəlib.

AİHM-nin qərarına görə, Azərbaycan hakimiyyəti Strasburq Məhkəməsinə "ərizəçinin ilkin araşdırma müddətinə həbsdə saxlanması zərurətinin əsaslandırılması üçün kifayət qədər əsas" təqdim etməyib.

AİHM Pənahlıya mənəvi ziyana görə 3 min avro və məhkəmə xərclərinin ödənilməsi üçün 1 min avro ödənilməsi barədə qərar verib.

AİHM-də Pənahlının maraqlarını məşhur azərbaycanlı hüquqşünas və hüquq müdafiəçisi İntiqam Əliyev təmsil edirdi. -06D-