Aleksandr Lukaşenko KTMT-nin baş katibini təyin edib

Bakı/21.12.18/Turan: Dekabrın 21-də Belarus prezidenti Aleksandr Lukaşenko Təhlükəsizlik Şurasının dövlət katibi Stanislav Zas ilə işgüzar görüş keçirib. Görüş zamanı o bildirib ki, S.Zasın Kollektiv Təhlükəsizlik Müqaviləsi Təşkilatının (KTMT) baş katibi təyin edilməsi barədə qərar layihəsini imzalayıb.

BELTA agentliyi bildirib, S.Zas KTMT üzvü dövlətləri - Qazaxıstan, Qırğızıstan, Tacikistan və Rusiya rəhbərləri ilə görüşləri barədə məlumat verib. Onlar S.Zasın təşkilatın baş katibi postuna namizədliyini dəstkləyiblər.

A.Lukaşenko KTMT Kollektiv Təhlükəsizlik Şurasının müfaviq qərar layihəsini imzalayaraq S.Zasın təyinatını rəsmən dəstəkləyib.

A.Lukaşenko KTMT baş katibinin rolu və əhəmiyyəti barədə danışıb, Zasın namizədliyinin əleyhinə olan Ermənistanın adını çəkməyib. Ermənistan Yuri Xaçaturovun yerinə baş katibin Yerevan nümayəndəsi olmasına təkid edir.

Rəsmi Yerevan hələlik Lukaşenkonun hərəkətinə reaksiya verməyib. Qeyd edək ki, KTMT-də qərarlar konsensus ilə qəbul olunur və Ermənistanın razılığı olmadan məsələ həll edilə bilməz.

Görünür, KTMT baş katibi məsələsi gələn həftə Moskvada Putin və Paşinyanın görüşündə əsas məsələlərdən biri olacaq.-02D-