Aleksey Overçuk: “Moskva kommunikasiyaların açılması ilə bağlı demək olar ki, gündəlik rejimdə Bakı və Yerevanla əlaqə saxlayır”

Bakı/16.06.23/Turan: Moskva Azərbaycan və Ermənistan arasında nəqliyyat əlaqələrinin  açılması ilə bağlı Bakı və Yerevanla demək olar ki, hər gün əlaqə saxlayır. Bu barədə Rusiya baş nazirinin müavini Aleksey Overçuk  Sankt-Peterburq Beynəlxalq İqtisadi Forumunun kuluarlarında bildirib.

“Rusiya danışıqlarda iştirak edir, həll yolları təklif edir, Azərbaycan və Ermənistan baş nazirlərinin müavinləri arasında ünsiyyəti, dialoq platformasını təmin edir. Mən nəqliyyat kommunikasiyalarının nə vaxt açılacağı barədə suala cavab vermirəm, tərəflər nə vaxt razılaşacaqsa, o zaman da açılacaq”,- RİA-Novosti Overçukdan sitat gətirib.

Onun sözlərinə görə, Azərbaycan və Ermənistandan olan həmkarları ilə Moskvada keçirilən görüşdən sonra həll olunmamış məsələlərlə bağlı Azərbaycanın baş nazirinin müavini Şahin Mustafayevlə Beynəlxalq İqtisadi Forumu çərçivəsində müzakirələr aparıb.

"Əsas iş daim davam edir. Biz Azərbaycan və Ermənistan tərəflərilə demək olar ki, hər gün nəqliyyat əlaqələrinin açılması mövzusunda əlaqə saxlayırıq. Həqiqətən də belədir. Biz daimi ünsiyyətdəyik - telefon zəngləri, fayl mübadiləsi. İş təkcə görüşdən görüşə aparılmır", -o, üçtərəfli işçi qrupun növbəti görüşünün vaxtını şərh edərkən bildirib.

Bundan öncə,  iyunun 2-də Overçuk Moskva, Bakı və Yerevanın işçi qrupunun görüşünün yekunları üzrə Azərbaycan və Ermənistan arasında nəqliyyat kommunikasiyalarının açılması üzrə dialoqda mühüm irəliləyişin olduğunu qeyd edib.06В