"Amerika qayıtdı. Diplomatiya qayıtdı" - Bayden ABŞ-ın xarici siyasətini sıfırlayır

Vaşinqton/05.02.21/Turan: Xarici siyasətin vəd edildiyi kimi yenidən yüklənəcəyini bəyan edən ABŞ prezidenti Co Bayden cümə axşamı Moskvaya meydan oxuyub, qalan dünyaya Amerikanın milli təhlükəsizlik strategiyasının "Amerika qayıtdı. Diplomatiya qayıtdı" prinsiplərini rəhbər tutacağı haqqında gurultulu və açıq siqnal göndərib.

Bayden Dövlət Departamentində çıxış edərkən bildirib ki, Vaşinqton Rusiyanın addımlarına qarşı yeni, qətiyyətli yanaşma nümayiş etdirəcək.

"Prezident Putinə sələfimin üslubundan tamamilə fərqli bir üslubla başa saldım ki, ABŞ-ın Rusiyanın aqressiv addımları - bizim seçkilərə müdaxilə və öz vətəndaşlarını zəhərləməsi qarşısında geri çəkildiyimiz günlər geridə qaldı".

"Biz tərəddüd etmədən Rusiya üçün qiyməti qaldıracağıq və həyati əhəmiyyət kəsb edən maraqlarımızı və xalqımızı qoruyacağıq. Və biz digər tərəfdaşlarımız - həmfikirlərimizlə koalisiyada və koordinasiyalı fəaliyyət göstərsək Rusiya ilə münasibətlərimizdə daha effektiv olarıq", deyə o bildirib.

Baydenin fikrincə, Aleksey Navalnının siyasi motivlərlə həbs edilməsi və Rusiyanın ifadə və sərbəst toplaşmaq azadlıqlarını pozmaq səyləri "bizim və beynəlxalq ictimaiyyətin" dərin narahatlığını doğurur.

"Cənab Navalnı, eləcə də bütün Rusiya vətəndaşları Rusiya konstitusiyasına uyğun olaraq öz hüquqlarından istifadə etmək hüququna malikdir. O, korrupsiyanı ifşa etdiyinə görə təqib obyektinə çevrilib. O, dərhal qeyd-şərtsiz azad edilməlidir", deyə o, əlavə edib.

Bayden həmçinin Çin tərəfindən ABŞ-ın təhlükəsizliyinə və demokratik dəyərlərinə çağırışlara reaksiya verməyə söz verib, onu Amerikanın "ən ciddi rəqibi" adlandırıb. O, müxtəlif sahələrdə, o cümlədən insan hüquqları, əqli mülkiyyət və iqtisadi siyasətdə Pekinə qarşı mübarizə aparmağa söz verib.

“Amma biz Amerikanın maraqlarına uyğun olduqda Pekinlə işləməyə hazırıq. Biz güc nöqteyi-nəzərdən rəqabət aparacağıq, daxili quruculuğumuzu yaxşılaşdıracağıq, müttəfiqlərimiz və tərəfdaşlarımızla işləyəcəyik, beynəlxalq təşkilatlarda rolumuzu yeniləyəcəyik və öz nüfuzumuzu və əksəriyyəti itirilən mənəvi dəyərlərimizi qaytaracağıq”.

Ağ Ev rəsmilərinin sözlərinə görə, Baydenin bu iradları onun bütün xarici siyasətini əhatə etmir, daha çox onun əvvəlcədən qəbul etdiyi qərarlara aiddir. Maraqlıdır ki, Bayden prezident qismində ilk böyük xarici siyasət nitqində İranın adını çəkməyib və Türkiyə ilə münasibətlərə toxunmayıb. -25B-