Media-icmal 05.02.21

"Metbuat.az" saytında "Niyə orta məktəblərdə hüquq dərsləri keçirilmir? - ekspertlərdən açıqlama" sərlövhəli məqalədə müəllif verilən suala ekspertlərlə cavab axtarır.

Müəllif diqqətə çatdırır ki, son illər hüquqi biliklərin artırılması yönündə Azərbaycanda müxtəlif layihələr həyata keçirilsə də, əhalinin hüquqi savadı istənilən səviyyədə deyil.

Ekspertlərə görə isə, gözlənilən nəticənin əldə olunması üçün ilk növbədə ümumtəhsil müəssisələrində bu sahənin tədrisi genişləndirilməlidir.

Bəzi ekspertlər isə bu düşüncədədir ki, ümumtəhsil məktəblərində hüquq dərslərinin keçirilməsi cəmiyyətdə baş verən hüquq pozuntularının aradan qaldırılmasına təsir etməyəcək. Onlara görə, əsas məsələ təhsilin məzmununa baxışın dəyişməsidir.

Bəzi ekspertlərə görə, hər kəs öz hüququnu bilməlidir və istənilən vətəndaşın, hətta hər bir orta məktəb şagirdinin də öz hüquqlarını bilməsi vacibdir. Hətta bəziləri bunu da vurğulayır ki, orta təhsil dövründə bütün sahələr üzrə elmlər öyrədilsə də, hüquq sahəsi tədris olunmur: "Ona görə də yaxşı olardı ki, aşağı siniflərdən başlayaraq 11-ci sinifə qədər bütün orta təhsil müəssisələrində hüquq dərsləri tədris olunsun", deyə ekspertlər mövqelərini ifadə edirlər.

Ümumi olaraq isə ekspertlər bu düşüncədədirlər ki, bütün şagirdlər hüquqi elmi mənimsəyərək hüquq və azadlıqlarından xəbərdar olmalıdırlar.

"Modern.az" saytı isə "Bundan sonra təhsildə heç bir halda qapanmaya getməməliyik" sərlövhəli məqalədə müəllif pandemiya şəraitində təhsilin tədrisini ictimaiyyətə şərh edir. 

Müəllif məsələnin aktual olmasını fevralın 8-dən ümumtəhsil məktəblərinin I-IV və V-IX siniflərində, fevralın 15-dən isə ali məktəblərin praktik məşğələ tələb edən fənləri üzrə təhsilin əyani tədrisinin qismən bərpa olunması ilə əlaqələndirir.

Təhsil sahəsi üzrə ekspert Kamran Əsədov deyir ki, təhsil prosesi nəhayət bütün pillələr üzrə bərpa edilməlidir. Amma ekspert belə bir halı vurğulayı ki, orta məktəblərdə  müəllimlərin 40%-ə yaxının yaşı 50, ali məktəblərdə isə 70%-nin yaşı kifayət qədər yuxarıdır və pandemiya şəraitilə bağlı bu kateqoriya şəxslərin məktəbə getmələri tövsiyə olunmur.

Ekspert vurğulayır ki, ali təhsil müəssisələri həmin şəxsləri vaksinasiyaya cəlb etdikdən sonra auditoriyaya buraxa bilər.

Ekspert əlavə edir ki, qapanma ilə hansısa uğur əldə edilə bilməz, əksinə,  bu qapanmalar potensial daşıyıcıların və yoluxmuş şəxslərin gizlənməsinə, digər şəxsləri yoluxdurmasına səbəb ola bilir: "Hesab edirəm ki, biz heç bir halda yenidən qapanmaya getməməliyik, çünki bu halda biz uğur əldə edə bilmərik. 

Artıq vaksinasiya başlayıb və bir müddət sonra tam açılışa doğru gedə bilərik".

"Azpolitika.info" saytında "Prezident bu məmurlarla vidalaşmaq istəyir...Onlara "hədəfdə olan heyət" də demək olar" sərlövhəli məqalədə müəllif dövlət başçısı İlham Əliyevin iri ranqlı məmurları bu günlərdə kəskin tənqid etməsinin səbəblərini ekspert İlham İsmayılla şərh edir.

Ekspert hesab edir ki, əvvəl bu işi görmək elə də asan deyildi: "Onların aid olduğu klanların basqısı olub, zaman-zaman buna görə ölkə rəhbərliyi ehtiyatlı davranıb.

Ekspertə görə, dövlət başçısının bu günlərdəki tənqdi ehtiyatlılığın aradan qalxdığının, yeni kadr siyasətinə köklü keçidin əsasının qoyulduğunun göstəricisidir. "Köhnə kadrlarla üzülüşmək, oliqarxiya sistemindən aralanmaq istəyirlər", deyə ekspert bu tənqidlərin mahiyyətini izah edir.          

Ekspert əlavə edir ki, cəmiyyət bu oliqraxlara xoş münasibət bəsləmir, illərdir ki, oliqarxiya sisteminin başında olan adamların adları eyni vaxtda bir yerdə çəkilir. 

"O adamlar ki, məhz onların simasında uzun illər hakimiyyət tənqid hədəfi olub. Aydın məsələdir ki, onların hamısı bir qərarla işdən çıxarılmayacaq. Amma görünür, 2021-ci ildə sistem bu adamlarla vidalaşacaq".

Ekspert deyir ki, İqtisadiyyat nazrinin simasında yeni heyət var, amma bu, idarəetmədə köklü dəyişikliklər olması demək deyil, nisbi dəyişklik olması da inkar edilə bilməz. 

"Sfera.az" saytı isə "Səlim Müslümovun həbsinə münasibət" sərlövhəli məqalədə keçmiş əmək və əhalinin sosial müdafiəsi naziri Səlim Müslümovun həbsini deputat Bəhruz Məhərrəmovla dəyərləndirir.

Belə ki, keçmiş nazir Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə həbsə alınıb.

B.Məhərrəmova görə, bu həbs istər vəzifədə, istərsə də vəzifədən kənarlaşdırıldıqdan sonra fəaliyyətində qanunsuzluq olan hər kəsin qanun qarşısında cəzalandırılacağının göstəricisidir.

Deputat deyir ki, hüquqi dövlətdə hər kəs törətdiyi əmələ görə qanunvericilik çərçivəsində məsuliyyətə cəlb oluna bilər. İstər Səlim Müslümov, istərsə də digərləri fəaliyyətində nöqsanlara yol veribsə, bunun həm mənəvi, həm də maddi tərəfi var: "Əgər bu şəxslərin büdcəyə əl uzatması, korrupsiyaya bulaşması, dövlət büdcəsini talaması, insanlara yönəlik yardımları mənimsəməsi varsa, təbii ki, hər kəs qanun qarşısında cavab verəcək", deyə deputat bildirir.

Deputata görə, bu, həm xalqa, həm də dövlətə xəyanətdir, digər tərəfdən isə Azərbaycanda korrupsiya ilə mübarizənin kampaniya xarakteri daşımamasının nümunəsidir.

Deputat əlavə edir ki, müəyyən olunan beş milli prioritetdən biri də dövlətin korrupsionerlərdən təmizlənməsidir ki, bu istiqamətdə fəaliyyətin davam etdirilməsi gözləniləndir.