Hakimiyyət Qubad İbadoğlundan qisas almağa davam edir

Fevralın 3-də Bakı Apellyasiya Məhkəməsi hakim Habil Məmmədovun sədrliyi ilə Nərimanov Rayon Məhkəməsinin iqtisadçı və siyastəçi Qubad İbadoğlunun bütün əmlakının üzərinə həbs qoyulması barədə qərardadından verilən şikayəti təmin etməyib.

"Biz Sovet dövründən və 1990-cı illərdən ailəmizə məxsus dörd mənzilin sənədlərini təqdim etdik. Əlavə olaraq, ailəmizin maliyyə mənbələri və mənzillərin vərəsəliklə ailmizə keçməsi barədə sənədləri hakimlərə təqdim etdik. Əmlak mənim həyat yoldaşıma məxsusdur, mənzillər 90-cı illərdə vərəsəlik hüququ ilə həyat yoldaşımın adına keçən mənzillərin satışından əldə edilən vəsaitlə alınıb. Bunlar hamısı 90-cı illərdə baş verib. Amma məhkəmə qanuni qərar qəbul etmək əvəzinə, təqdim etdiyimiz sənədləri araşırmadan, Nərimanov Rayon Məhkəməsinin qərardadını qüvvədə saxladı", deyə İbadoğlu Turan Agentliyinə bildirib.

Qərardan Avropa İnsan Hüquqları Məhkəməsinə şikayət veriləcək.

İbadoğlu həmçinin səhhətinin pisləşməkdə davam etdiyini deyib.

"Səhhətim indiki anda yalnız dərmanların və Allahın ümidinə qalıb. Çünki artıq həkimlər də məni müayinə və müalicə etməkdən imtina edirlər, çəkinirlər. Hətta son dəfə müraciət etdiyim həkimin sualı ondan ibarət oldu ki, xəstəxanaya gəlmək üçün icazə almısınızmı? Məlumat vermisinizmi? Bu baxımdan Azərbaycanda adekvat tibbi yardım ala bilmirəm. İnidki vəziyyətim əvvəlkindən daha pisdir. Çünki son müayinə altı ay əvvəl keçirilmişdi. Müayinə göstərdi ki, daha əvvəlki altı ayda damarda genişlənmə artıb. Bu, tibdə sürətli inkişaf sayılır və indi cərrahi müdaxilə səviyyəsindəyik. Bu, mənim həyatım üçün kifatyət qədər risklidir", deyə o qeyd edib.

"Bundan başqa, aortanın genişlənməsi dəgər əlavə problemlər yaradıb. Bu, artıq ürək qapağının zədələnməsinə gətirib çıxarıb. Çalışıram ki, dərmanlarla təzyiqimi, şəkərimi, qanda bəzi elementləri tənzimləyim. Dərmanların da uzun müddət qəbulu əlavə problemlər yaradır", deyə İbadoğlu bildirib.

Barəsindəki cinayət işinin təhqiqatına gəlincə, təhqiqat 29 iyul 2024-cü il tarixində dayandırılıb. "O vaxtdan etibarən mənə və müdafiəçilərimə heç bir əlavə məlumat verilmir", deyə o qeyd edib.

Bu fonda 27 noyabr 2024-cü il tarixində qəfildən Qubad İbadoğlunun ailəsinə məxsus daşınmaz əmlakın müsadirəsi haqqında qərar qəbul edilib. Göründüyü qədər, bu, hakimiyyətin beynəlxalq ictimaiyyətin İbadoğluna qarşı təzyiqi dayandırmaq və onu müalicə üçün xaricə buraxmaq barədə çoxsaylı tələblərinə cavabı idi.