Qazaxıstan AZAL-ın təyyarəsinin Aktau yaxınlığında qəzaya uğraması ilə bağlı ilkin hesabatı dərc etməyə hazırlaşır

Qazaxıstanın nəqliyyat naziri Marat Karabaev fevralın 4-də keçirilən mətbuat konfransında bildirib ki, AZAL-ın təyyarəsinin Aktau yaxınlığında qəzaya uğraması ilə bağlı ilkin hesabat yaxın günlərdə dərc olunacaq.

"Hesabat yekunlaşma mərhələsindədir və yaxın günlərdə biz ilkin hesabatı Qazaxıstan Mülki Aviasiya Komitəsinin saytında dərc edəcəyik", deyə nazir bildirib.

Bir müddət əvvəl Aviasiya Hadisələrinin Araşdırılması və Qarşısının Alınması Mərkəzində (CENIPA) təyyarənin qara qutusundan əldə edilən məlumatların təhlilinin yekunlaşdığı bildirilmişdi. "Azərbaycan Hava Yolları"nın (AZAL) Aktau yaxınlığında qəzaya uğrayan təyyarəsinin qeydiyyatçılarından məlumatlar götürülüb. Embraer 190 təyyarəsindən əldə olunan məlumatların qəzanı araşdıran Qazaxıstan hakimiyyətinə göndərildiyi bildirilmişdi.

"Mütəxəssislərin öz işlərini yekunlaşdırmaq üçün vaxta ehtiyacı var. İlkin hesabat dərc olunana qədər əlavə şərh verməyəcəyik", deyə Marat Karabaev əlavə edib.

İCAO Konvensiyasına uyğun olaraq, qəzanın araşdırılmasına Qazaxıstan rəhbərlik edir. Araşdırma işində Azərbaycan, Rusiya mütəxəssisləri, beynəlxalq ekspertlər və Embraer-in nümayəndələri iştirak edirlər. Qara qutular çıxarılıb və beynəlxalq ekspertlərin iştirakı ilə oxunur.

* 25 dekabr 2024-cü il tarixində Aktau hava limanından 3 km məsafədə Azərbaycan Hava Yollarına (AZAL) məxsus Embraer təyyarəsinin iştirakı ilə faciəvi qəza baş verib. Bakı-Qroznı reysini həyata keçirən təyyarə təcili enişə cəhd edərkən qəzaya uğrayıb. Təyyarədə 62 sərnişin və 5 ekipaj üzvü var idi, onların 38-i həlak olub.