Tramp hərbi yardım müqabilində Ukraynadan nadir torpaq elementləri istəyir

ABŞ prezidenti Donald Tramp bazar ertəsi bildirib ki, Rusiya təcavüzünə qarşı daimi hərbi yardım müqabilində Ukraynadan nadir torpaq elementləri və digər məhsulların tədarükü haqqında sövdələşmə bağlamaq istəyərdi, xəbəri Turan-ın Vaşinqtondakı müxbiri verib.

"Biz Ukrayna ilə sövdələşmə bağlamaq istərdik ki, bu sövdələşməyə əsasən onlar nadir torpaq elementləri və digər resursları müqabilində bizim onlara tədarük etdiklərimizi alsın", deyə Tramp Oval Kabinetdə jurnalistlərə bildirib.

Ukraynanın uran, titan, nikel kimi dəyərli təbii resurslarının əksəriyyəti hazırda Kremlin nəzarəti altında olan bölgələrdə - Donetsk və Zaporojye vilayətlərindədir. 

Ukraynanın çıxışı qoruyub saxladığı faydalı qazıntılar batareyaların, radiolokasiya sistemlərinin, zirehin, həmçinin tibbi avadanlıqların istehsalı üçün həlledici əhəmiyyət kəsb edir. Bütün bunlar Qərb müttəfiqlləri üçün mühüm əhəmiyyət daşıyır.

Tramp əlavə edib ki, münaqişəyə son qoymaq üçün danışıqlar davam etdiriləcək. "Biz Rusiya ilə Ukrayna məsələsində böyük irəliləyiş əldə etmişik", deyən Tramp təfərrüatları açıqlamayıb. "Bu mənasız müharibəni dayandıracağıq".

Həftə sonu Ukrayna prezidenti Vladimir Zelenski bildirib ki, onun komandası Tramp administrasiyası ilə əlaqə saxlayıb və tezliklə şəxsi görüşlərin keçiriləcəyini hesab edir.