Fəal məhkəmədə polis bölməsində zorakılıq və təhdidlər haqqında danışıb

Fevralın 3-də Bakı Ağır Cinayətlər Məhkəməsində fəal Nicat İbrahimov barəsində ittiham aktı oxunub. Prokurorun iddiasına görə, İbrahim Bəhman Əliyev adlı bir şəxsə bıçaq xəsarəti yetirib. İbrahim ittihamları təkzib edib və heç kimi bıçaqlamadığını bildirib.

Onun sözlərinə görə, insident 9 sentyabr 2024-cü il tarixində baş verib. İbrahimin sözlərinə görə, o, 3-cü mikrorayonda yerləşən YDM-ə gedib, burada bir kişi ona yaxınlaşıb və alışqan istəyib. "O, cavab gözləmədən mənə hücum etdi. Dərhal polis gəldi. Onlar mənim ağzımı və gözlərimi bağladılar", deyə İbrahim qeyd edib.

Daha sonra o, Nəsimi Rayon Polis İdarəsinə aparılıb, burada onu özünə və qohumlarına işgəncə verməklə hədələyiblər.

"Onlar məni etiraf ifadəsi imzalamağa məcbur ediblər. Buna etiraz əlaməti olaraq dəftərxana bıçağı ilə özümə xəsarət yetirdim. Bundan sonra onlar mənim barəmdə cinayət işi açdılar", deyə İbrahim bildirib.

Sentyabrın 6-da o, ailəsi ilə birlikdə Azərbaycandan xaricə getmək istəyib, lakin hava limanında onu reysə buraxmayıblar. İbrahim DİN-in 102 xidmətinə zəng edib və ölkədən çıxışına qoyulmuş qadağanın səbəbini soruşub.

"Mən qəzəbli idim və DİN-in qarşısında özümü yandıracağımı söylədim. Şikayətim 19-cu polis bölməsinə yönləndirildi. Orada məndən niyə özümü DİN-in qarşısında yandırmaq istədiyimi soruşdular. "Get özünü hava limanında yandır" dedilər.

Mənə qarşı bu münasibəti başa düşmürəm. Mən jurnalist deyiləm, bloger deyiləm. Prezidentdən narazılıq bildirmirəm. Əksinə, prezident mənə Laçında ev verib. Biz Laçından məcburi köçkün idik", deyə İbrahimov bildirib.

Vəkil Zibeydə Sadıqova İbrahimin polis bölməsində pis rəftara məruz qalması ilə bağlı şikayətinə baxılması haqqında vəsatət qaldırıb. Məhkəmə şikayəti araşdırılması üçün Nəsimi Rayon Prokurorluğuna göndərib. Növbəti iclas martın 3-nə təyin edilib.

* Sentyabrın 6-da Nicat İbrahimi Bakı Beynəlxalq Hava Limanının sərhəd keçid məntəqəsindən xaricə buraxmayıblar. Ona bildiriblər ki, Daxili İşlər Nazirliyi ölkədən xaricə çıxışına qadağa qoyub. Onun həyat yoldaşı və iki uşağı sərhəd keçid məntəqəsini keçərək Kişinyova gedib. Bundan sonra Nicat İbrahim DİN-ə müraciət edərək qanunsuz qadağanı ləğv etməyi tələb edib və DİN-in binası qarşısında özünü yandırmaqla hədələyib.

Sentyabrın 9-da o, qəsdən sağlamlığa ağır zərər vurmaqda ittiham edilərək saxlanılıb. Dekabrın 11-də ittiham 126.2.4-cü (Qəsdən sağlamlığa ağır zərər vurma- ümumi təhlükəli üsulla, xuliqanlıq niyyətilə) maddəyə tövsif edilib.

Ona qarşı həmçinin 221.3 (Xuliqanlıq-əməllərin silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) maddə ilə ittiham irəli sürülüb. Bu maddələrlə onu 11 ilədək azadlıqdan məhrumetmə cəzası gözləyir.

** İbrahim 2021-ci ildə artıq həbs edilib və karantin rejimini pozma ittihamı ilə 15 ay müddətinə azadlıqdan məhrum edilib. Həbsin səbəbi onun prezident administrasiyası qarşısında təkbaşına piket keçirməsi olub.