"Amnesty International" Qubad İbadoğlunun müdafiəsi üçün kampaniyaya başlayıb

Bakı/22.08.23/Turan: Beynəlxalq insan haqları təşkilatı "Amnesty International" Azərbaycanda həbs edilən müxalif siyasətçi və iqtisadçı-alim Qubad İbadoğlunun müdafiəsi üçün kampaniyaya başlayıb.

“Qubad İbadoğlunun həbsi və mühakimə olunması hökuməti tənqid etməsi, siyasi və ictimai fəaliyyəti, o cümlədən azərbaycanlı korrupsionerlərin həbs edilən xarici aktivlərindən azərbaycanlı tələbələr üçün vəsaiti ayrılmağına çalışan fondun yaradılmasına kömək etdiyinə görə açıq-aşkar qisasdır. 

Qubad İbadoğlunun səhhətində ciddi problemlər var və həbsdə onun həyatı pis şərait və lazımi tibbi yardımın olmaması səbəbindən təhlükə altındadır”, - təşkilatın saytında yerləşdirilən bəyanatda bildirilir.

"Amnesty İnternational" təşkilatı həmçinin İbadoğlunun azadlığa buraxılması tələbi ilə Azərbaycan prezidenti İlham Əliyevə müraciətin mətnini dərc edir və bütün maraqlı şəxsləri onu imzalayıb Azərbaycan rəhbərliyinə göndərməyə çağırır.

Müraciətdə qeyd edilir ki, İbadoğlu qurama saxta pul satmaq ittihamı ilə həbs edilib. 

“Qubad İbadoğlu ağır xəstədir, o cümlədən 2-ci dərəcəli şəkərli diabet və hipertoniya xəstəsidir. O, qeyri-insani və ləyaqəti alçaldan şəraitdə saxlanılır, keyfiyyətsiz içməli su və qidadan istifadə etməyə məcburdur, lazımi dərmanları vaxtında almır. Həbsdə onun səhhətinin vəziyyəti durmadan pisləşir”, - İbadoğlunun dərhal azad edilməsini, daha əvvəl isə onu lazımi dərman və qida ilə təmin edilməsini, onun işgəncə və pis rəftardan qorunmasını tələb edən müraciətdə qeyd olunur. 

Müraciətdə həbs olunarkən İbadoğluya və onun həyat yoldaşı İradə Bayramovaya  zorakılıq edən şəxslərin cəzalandırılması tələbi də yer alıb.

Müraciətin sonunda Azərbaycan rəhbərliyinə “hökuməti dinc şəkildə tənqid edənləri və fərqli fikirdə olanları mühakimə etmək üçün cinayət ədliyyə sistemindən sui-istifadəyə son qoymağa” çağırış yer alıb. 16В