Anar Həsənov Avstraliyada siyasi sığınacaq alması barədə fikirləri təkzib edir

Azərbaycanın Avstraliyadakı səfirliyinin üçüncü katibi Anar Həsənov  Turan agentliyinə müraciətində bildirib ki, səfirlikdəki korrupsiya faktları ilə bağlı dəfələrlə dövlət başçısına müraciət edib. Baş verənləri araşdırmaq əvəzinə onu böhtanda ittiham ediblər. Bundan sonra bəzi KİV məlumat yayıb ki, o, Avstraliyada siyasi sığınacaq istəyib.

A.Həsənov öz müraciətində konkret olaraq səfir Cəmşidovu və səfirliyin mühasibi Xasıyevi ciddi maliyyə pozuntularında ittiham edib.

A.Həsənov KİV-i onun açıqladığı sənədlərlə tanış olmağa və dövlət başçısına məlumat verməyə çağırıb. Belə ki, bu şikayətlər dövlət başçısına “gedib çatmır”.

O, dövlət başçısının adına müraciətində yazıb ki, səfirliyin mühasibi spirtli içki və siqaret alveri ilə məşğul olur. Onları diplomatik ticarət şəbəkəsində aşağı qiymətə alaraq bir neçə dəfə baha qiymətə satır. Diplomatın sözlərinə görə, bu yolla qanunsuz gəlirlərin məbləği 30 min dollar təşkil edib.

Bundan əlavə, katibə yerinə sənədləşdirilən şəxsin adı var, özü yoxdur. Hər ay onun adına 2700 dollar köçürülüb. Bir neçə il ərzində mənimsənilən məbləğ 68 min dollar təşkil edib.

Budan başqa səfitliyin xidməti mənzillərindən birində kommersiya obyekti – turizm firmasının ofisi açılıb. Burada Azərbayacana gedən turistlərə xidmət göstərilir.

A.Həsənov səfirliyin fəaliyyətindəki digər pozuntulardan da danışır və dövlət başçısından bunun araşdırılmasını, bu pozuntulara qiymət verilməsini xahiş edir. Onun müraciəti baxılmaq üçün XİN-ə verilib. XİN rəhbəri Elmar Məmmədyarov iyulun 27-də A.Həsənovun geri çağırılması barədə qərar qəbul edib. Bu zaman A.Həsənovun həyat yoldaşının hamilə olması, həkimlərin onun təyyarə ilə uçmasına icazə verməməsini nəzərə almayıblar.

A.Həsənov bildirib ki, onun şikayətinə baxılması ilə Prezident Administrasiyası rəhbərinin müavini Novruz Məmmədov da məşğul olub. Lakin nəticədə diplomatı nəinki işdən çıxarıblar, həm də hamilə xanımı ilə birlikdə yaşadığı xidməti mənzildən çıxarıblar.

XİN sistemində korrupsiyanı ifşa etdiyinə görə çətin vəziyyətə düşən diplomat dövlət başçısından tədbir görülməsini və onun hüquqlarının müdafiə olunmasını xahiş edir.

Bundan öncə Azərbaycan XİN bəyanatla çıxış edərək A.Həsənovun söylədiklərini böhtan adlandırıb, lakin böhtanın nədən ibarət olduğunu konkretləşdirməyib.

A.Həsənovun müraciətilə bağlı XİN-dən şərh almaq mümkün olmayıb.-02B-