Ankara Tehranın hücumlarını rədd edir

Bakı/12.12.20/Turan: Türkiyə prezidenti Rəcəb Tayyib Ərdoğanın ünvanına  əsassız hücumlarla əlaqədar İranın Ankaradakı səfiri Məhəmməd Ferazmend Türkiyə XİN-ə çağırılıb, “Anadolu” agentliyi məlumat yayıb.

Ankaradakı diplomatik mənbələrin məlumatına görə, İİR XİN rəhbəri Cavad Zərifin Twitter-də yazısı Türkiyə tərəfinin narazılığına səbəb olub.

İranlı diplomatın nəzərinə çatdırılıb ki, İranda Türkiyəyə qarşı nifrət kampaniyasının başlaması yolverilməzdir.

“Türkiyə Ankaranın ünvanına istənilən hücum formasını pisləyir və qəti şəkildə rədd edir. İranın  Türkiyə ilə bağlı hər hansı məsələyə dair narahatlığını çatdıra bilmək üçün yetərincə rabitə kanalları var.

Bununla yanaşı, İran diplomatiyasının rəhbəri Türkiyəni Tvitter-də tənqid etməyə üstünlük verib. Bu cür yanaşmalar Türkiyə ilə İran arasında münasibətlərin səviyyəsinə mane olur və Ankara - Tehran əlaqələrində ixtilaf yaratmağa çalışan dairələrin maraqlarına cavab verir", - Ankara mənbələrində qeyd ediblər.

Dekabrın 11-də İranın xarici işlər naziri M.C.Zarif Tvitter səhifəsində T.R.Ərdoğanı Azərbaycanın suverenliyini pozmaqda ittiham edib. "Prezident Ərdoğana məlumat verilməyib ki, onun Bakıda söylədiyi fikirlər Arazın şimalına doğru İran ərazilərinin zorla ələ keçirilməsinə aiddir. Məgər o, Azərbaycan Respublikasının suverenliyini pozduğunu anlamırdı?"- Zarif dekabrın 10-da Türkiyə prezidentinin Bakıda Azərbaycan şairi Bəxtiyar Vahabzadənin şerindən gətirdiyi sitatı nəzərdə tutaraq ritorik sual verib.

Əslində isə şer parçalanmış Azərbaycan xalqının faciəli taleyinə həsr olunub.

Cümə günü İran XİN Ərdoğanın Bakıda paraddakı çıxışı ilə bağlı Türkiyənin Tehrandakı səfirinə narazılığını bildirib.—0—