Moskvada Ərdoğanın Qafqazda regional platforma barədə ideyasına diqqət yetiriblər

Bakı/12.12.20/Turan: RF XİN rəhbəri Sergey Lavrov İran Dövlət Teleradio Şirkətinə müsahibəsində Qarabağ münaqişəsinin nizamlanması üzrə İranın planının baş tutmamasını şərh edib.

“İran planı niyə qəbul edilmədi?” sualına cavabda Lavrov deyib: "Dağlıq Qarabağla bağlı biz qan tökülməsinə son qoymağa çalışırdıq. Münaqişə tərəfləri- Ermənistan və Azərbaycan bunu Rusiya Federasiyasının vasitəçiliyilə etməkdə maraqlı olduqlarını bildirdilər. Burada heç bir "pis” niyyət yoxdur.

Yeri gəlmişkən, Rusiyanın xarici işlər naziri vəzifəsində olduğum bütün illər ərzində iranlı həmkarlarımızla çoxsaylı əlaqələrimiz müddətində məsləhətləşmələrimiz və ya danışıqlarımız zamanı Qarabağ mövzusunun maraq doğurduğunu və səsləndiyini xatırlamıram.

Bu o demək deyil ki, biz İranın maraqlarına məhəl qoymuruq. İranın narahatlığını anlayırıq, belə ki, Azərbaycanla Ermənistan arasında münasibətlərin normallaşması İranın tranzit maraqlarına təsir göstərəcək, üstəlik bu tranzit maraqlar amerikalıların İrana qarşı sanksiya tətbiq etdiyi və bunu davam etdirdiyi bir vəziyyətdə  pisləşir.

Uzun illər ərzində təqdir edilən əsas prinsipdən imtina etmək mümkün deyil: münaqişənin nəticəsi bütün regionda münasibətlərin normallaşdırılması olmalıdır.

Ermənistan, Azərbaycan və Rusiya Federasiyası liderlərinin 9 noyabr tarixli birgə bəyanatında mövcud olmuş və münaqişənin bilavasitə qızğın çağında İranın təşəbbüsü ilə meydana çıxan magistral istiqamətlər aydın şəkildə qeyd edilib.

İndi nizamlanmaya kimin, nə vaxt kömək edə bilib-bilməyəcəyi barədə düşünmək lazım deyil. Bir daha vurğulayıram ki, formatın seçimi Azərbaycan və Ermənistan olub. Bəyanat iştirakçılarının tərkibi başqa heç nə ilə yox, məhz bununla şərtlənmişdi. Bunu İranın hesabına və ya Türkiyənin hesabına etmək üçün heç bir cəhd olmayıb və ola da bilməzdi. İndi əldə edilmiş bütün razılaşmaları axıra çatdırmaq və qarşıdurma regionunu dinc yanaşı yaşama, ən yaxşısı isə mehriban qonşuluq və əməkdaşlıq regionuna necə çevirmək barədə düşünmək vacibdir.

Türkiyə Prezidenti R.T. Ərdoğan bu günlərdə Bakıya səfəri zamanı üç Zaqafqaziya ölkəsi – Ermənistan, Azərbaycan və Gürcüstan və onların üç qonşusu – İran, Türkiyə və Rusiya arasında əməkdaşlığın qurulmasının mümkünlüyünü xatırladıb. Bu, üst səviyyədə müşahidədir. Biz hamımız yanaşı yaşayırıq və indi, Zaqafqaziya ölkələri arasında problemlərin aradan qaldırıldığı bir vaxtda qonşu kimi bu prosesə kömək etməliyik".

Lavrovun bu iradı prinsipial xarakter daşıyır və onu altı ölkənin iştirakı ilə regional platformanın yaradılması ilə bağlı Ərdoğanın ideyasına dəstək kimi qiymətləndirmək olar.

Hələlik Ermənistan bu ideyanı rədd edir, lakin Rusiyanın dəstəyi prinsipial əhəmiyyət daşıyır. -02D