Ann Brasser vətəndaş cəmiyyətinin problemlərinin həllinə yardıçmı olacağını vəd edir

Bakıda rəsmi səfərdə olan AŞPA prezidenti Ann Brasser bu gün vətəndaş cəmiyyəti fəallarından ibarət böyük qrupu qəbul edib.

3,5 saat davam edən görüşdə insan hüquqlarının vəziyyəti, vətəndaş cəmiyyətinin durumu, siyasi məhbuslar problemi müzakirə olunub.

Brasser görüş içtirakçılarından xahiş edib ki, tədbirin detalları mətbuata açıqlanmasın. O, problemlərin həllinə yardım göstərəcəyini vəd edib.

Görüşdə REAL hərəkatının icraçı katibi Natiq Cəfərli, hüquq müdafiəçiləri Arzu Abdullayeva, Səidə Qocamanlı, Günay İsmayılova, Zəlihə Tahirova, Samir Kazımlı, jurnalistlər Şahvələd Çobanoğlu, Nərgiz Yaqublu (siyasi məhbus Tofiq Yaqublunun ailəsinin üzvü kimi), NİDA hərəkatının üzvü Aygün Pəncəliyeva, vəkil Fariz Namazlı və başqaları iştirak ediblər.

Görüşdə iştiak etməyən bir neçə şəxsin adından Brasserə müraciət təqdim olunub. Müraciətin mətni jurnalist Xədicə İsmayılovaın Facebook səhifəsində yerləşdirilib.

Müraciətdə Assambleya Azərbaycanda insan hüquqlarının pozulması ilə bağlı təxirəsalınmaz addımlar atmağa çağırılır.

Qeyd olunur ki, həbsdə olan hüquq müdafiəçiləri Anar Məmmədli, Leyla Yunus, Rəsul Cəfərov və İntiqam Əliyev Avropa Şirasının dəyərlərini müdafiə etdiklərinə görə zərər çəkiblər. Emin Hüseynovu da həmin aqibət gözləyir.

Azərbaycanın Avropa Şurasında sədrliyi hüquq müdafiəçilərinə qarşı amansız repressiyalarla üzs-üstə düşüb. Avropa Şurası təşkilatın nüfuzu üçün görünməmiş təhlükə ilə üzləşib.

“Hazırda belə sual yaranır: Strasburq əsas hüquqları və Azərbaycan xalqını avtoritar hökumətdən qorumağa qadirdimi”, - müraciətdə deyilir.

Müəlliflər xatırladırlar ki, əgər dövlət Avropa Şurası standartlarını kobud şəkildə pozursa Assambleyanın  onun nümayəndə heyətinin səlahiyyətini dayandırmaq və ya səs hüququndan məhrum etmək, hətta Avropa Şurasından xaric olunmasını tövsiyə etmək hüququ var. Lakin görünür, Strasburq susmağa üstünlük verir.

“Cəsarətli azərbaycanlı hüquq müdafiəçiləri, fəallar, jurnalstlər və blogerlərin həbsxanada olduğu və ya ifadə azadlığı hüququnu gercəkləşdirmək üçün həbs təhlükəsi ilə yaşadığı bir vaxtda bu, yolverilməzdir”, - sənəddə qeyd olunur.

“Bu, sadəcə, yolverilməzdir. Parlament Assambleyasının prezidenti kimi sizin vəzifəniz Assambleyanın qaydalarında və Avropa Şurasının nizamnaməsində nəzərdə tutulan sanksiyalara çağırmaqdır”, - müraciətdə deyilir.

Bəyanat müəllifləri Brasseri ölkədə vətəndaş cəmiyyəti ilə “konstruktiv dialoq”un olması barədə  Azərbaycan rəhbərliyinin fikirlərinə inanmamağa və “dəyirmi masa”larda iştirak etməməyə çağırıb.

“Əgər “dəyirmi masa” bir çox jurnalist, bloger, fəal və hüquq müdafiəçisinin “evinə çevrilən” Kürdəxanı təcridxanasında təşkil olunmasa belə dəvətləri qəbul etməməyə çağırırıq”, - müəlliflər yazırlar.

Onlar ifadə azadlığı hüququnu həyata keçirdiklərinə görə həbs edilənlərin  dərhal və şərtsiz azadlığa buraxılmasına hökumət tərəfindən zəmanətin olmadığı təqdirdə 

Brasseri öz səlahiyyətlərindən istifadə edərək və Assambleyanın reqlamentinə uyğun olaraq Azərbaycan nümayəndə heyətinin səlahiyyətinə yenidən baxılması məsələsini qaldırmağa çağırıblar. -06В-