A.Paşazadə Putinin Qarabağı qaytaracağına ümid edir

Azərbaycan-Rusiya V Forumu çərçivəsində Azərbaycanda səfərdə olan İnquşetiya rəhbəri Yunusbek Yevkurov Qafqaz Müsəlmanları İdarəsinin (QMİ) sədri şeyxülislam Allahşükür Paşazadə ilə görüşüb.

QMİ-dəki mənbələr görüşdən öncə Y.Yevkurovun “Təzəpir” məscidi ilə tanış olduğunu və namaz qıldığını bildirir.

QMİ-də davam edən görüşdə isə A.Paşazadə Y.Yevkurovu Ramazan ayı münasibətilə təbrik edib. QMİ rəhbəri Azərbaycanda nəinki bütün müsəlman təriqətlərinə, o cümlədən bütün dinlərə bərabər səviyyəli şərait yaradılmasını nəzərə çatdırıb. QMİ sədri Qarabağ problemini Azərbaycanın əsas problemi adlandırıb. Ermənistanın Azərbaycana təcavüzü olmasaydı, ölkənin daha da güclü inkişaf edəcəyini söyləyib. Şeyx Qarabağ münaqişəsinin həlli, işğalda olan ərazilərin qaytarılması məsələsini də toxunub. A.Paşazadə Azərbaycanla Rusiya arasında güclü və köklü əlaqələr olduğunu, odur ki, dostların, o cümlədən, RF prezidenti Vladimir Putinin köməyi ilə işğal olunmuş torpaqların qaytarılacağına, münaqişənin sülh yolu ilə həllini tapacağına ümid etdiyini bildirib.

Mənbənin bildirdiyinə görə, Y.Yevkurov Qəbələdə keçirilən forumda iştirak etdiyini deyərək ətraf bir neçə rayonda da olduğunu, orada olan rusiyalıların firavan yaşadığını nəzərə çatdırıb. A.Paşazadənin fəaliyyətini yüksək dəyərləndirən Y.Yevkurov onu heç vaxt unutmayacaqlarını vurğulayıb.

Sonda qarşılıqlı hədiyyələr təqdim olunub, İnquşetiya rəhbəri A.Paşazadəyə “Qurani-Kərim” hədiyyə edib. -05B-