A.Paşazadə: Tolerantlıq bəşərin bəlalardan xilas formuludur

Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadə Nyu-Yorkda keçirilən dini Forumda çıxış edib. Bu xəbər Turan-a QMİ-dən məlum olub. 

A.Paşazadə Azərbaycanı “bütün səmavi dinlərin qovuşduğu” məkan kimi dəyərləndirib. QMİ sədri Azərbaycanda dini icmalar arasında milli, dini ayrı-seçkiliyə yol verilmədiyini, bütün icmaların əmin-amanlıq içində fəaliyyət göstərdiklərini nəzərə çatdırıb. A.Paşazadə dini konfessiya rəhbərləri arasında səmimi qardaşlıq və səmərəli əməkdaşlıq olduğunu bəyan edib.

“Ölkəmizdəki islam, pravoslav, yəhudi, katolik icması rəhbərləri hər zaman olduğu kimi, bu gün də bir yerdədir. Bunlar multikulturalizm ideyalarına sadiq Azərbaycanın mövcud dini-mənəvi reallığıdır. Müasir dövrün kəskin reallıqlarını izlərkən bu qənaətə gəlmək olar ki, milli və dini zəmində baş verən münaqişələrə qarşı biz ənənəvi dinlərin sülh, ədalət və mənəviyyat prinsiplərindən geniş istifadə edə bilərik. Bəşər ailəsinin üzvləri kimi bizləri  birləşdirən, bağlayan dəyərlər, bizi fərqləndirən və ayıran amillərdən qat-qat möhkəm, dərin və mühümdür”, deyə QMİ sədri ölkədəki dini mühitə dəyər verib.

A.Paşazadənin fkirincə, müasir dövrdə bəşəriyyəti narahat edən probemlərin əksəriyyəti daha çox mənəvi mahiyyət daşıyır. “Bəzən belə münasibət dinlərarası münasibətlərə gərginlik gətirir, terror əməllərinə dini ideologiya donu geyindirilməsi ikrah doğurur”, - deyəA.Paşazadə terror aktlarını dinlə eyniləşdirməyin əleyhinə çıxıb. QMİ sədri ad çəkmədən bəzi ölkələrdə islam dini haqqında yanlış təsəvvürlər yaradılmasına,  hətta islamla terrorun eyniləşdirilməsi cəhdləri olmasına diqqət çəkib. Bütün bu cəhdləri əsassız sayan A.Paşazadə kin, nifrət, zorakılıq və təcavüzün islamın hökmlərinə zidd olduğunu xatırladıb.

Qarabağ münaqişəsinin 20 ildən artıq davam etdiyini deyən QMİ sədri Azərbaycanın Ermnənistan tərəfdən etnik və milli zəmində təmizlənməyə məruz qaldığını söyləyib. Ermənilərin işğal etdikləri ərazilərdə müsəlman, yəhudi və xristian dini abidələrinin dağıdıldığına diqqət çəkilib. Onun firkincə, belə münasibət dinlərarası qarşıdurma təhlküəsinə yol aça bilər. 

O, dünyada sülhün, əmin-amanlığın, cəmiyyətlərdə sağlam mənəvi-əxlaqi mühitin bərqərar olması, dini-mənəvi dəyərlərin qorunması üçün din xadimlərinin səylərinin birləşdirilməsini vacib sayıb. “Bəşərin qlobal bəlalardan xilası insanlığın rifahı naminə birlik və tolerantlığın qorunub saxlanmasında, fəal təşviq olunmasındadır”, - deyə A.Paşazadə bu təhlükədən çıxış yolu göstərib. -05D-