Apellyasiya Məhkəməsi İstintaq Təcridxanasında 22 gündür aclıq edən iqtisadçını azad etməkdən imtina edib

İyulun 5-də Bakı Apellyasiya Məhkəməsi iyunun 14-dən İstintaq Təcridxanasında aclıq edən iqtisadçı Fazil Qasımovun ev dustaqlığına keçirilməsindən imtina ilə bağlı şikayətini təmin etməyib.

Bu barədə Turan-a vəkil Rövşanə Rəhimova bildirib.

Onun sözlərinə görə, F.Qasımov uzunmüddətli aclıq aksiyası səbəbindən tükənmiş vəziyyətdə olsa da, apellyasiya məhkəməsində çıxış edə bilib. O, istintaq zamanı qarşılaşdığı qanunsuzluqlar haqqında ətraflı danışıb.

F.Qasımov, xüsusən, saxlanıldıqdan sonra məruz qaldığı fiziki və psixoloji işgəncələr haqqında danışıb.

Qasımov bildirib ki, ona qarşı irəli sürülmüş saxta pul ittihamları absurddur.

O, ümumiyyətlə Türkiyədə yaşayırdı və 2023-cü ildə deportasiyadan əvvəl yalnız 2020-ci ildə qısa müddətlik Azərbaycanda olub.

Müdafiə tərəfi də Qasımovun həbsdə saxlanılmasını əsassız hesab edir.

"Fazil Qasımov, özünün də məhkəmədə dediyi kimi, artıq 11 aydır qanunsuz olaraq həbsdə saxlanılır və onunla bağlı heç bir istintaq hərəkəti aparılmır. Heç bir əsaslı səbəb olmadan istintaq və həbs müddəti uzadılır", deyə Rəhimova qeyd edib.

Rəhimovanın sözlərinə görə, F.Qasımov aclığı davam etdirmək niyyətində israrlıdır.

"Onun vəziyyəti kifayət qədər çətinləşib. Səhhətində ciddi problemlər var. Çox sürətlə çəki itirir. Təzyiqi 60/50 nisbətinədək düşüb. Gözləri qaralır, başı gicəllənir. Biz Penitensiar Xidmətin rəisinə və Ombudsman Aparatına Qasımovun müalicə müəssisəsinə köçürülməsi üçün müraciət etmişik. Ancaq hələlik nəticə yoxdur", deyə vəkil bildirib.

O qeyd edib ki, F.Qasımov barəsində qətimkan tədbirinin dəyişdirilməsindən imtina ilə əlaqədar AİHM-ə müraciət olunacaq.

"Biz Fazil Qasımov barəsində Avropa Konvensiyasının 5-ci (azadlıq və şəxsi toxunulmazlıq hüququ) maddəsinin pozulması ilə bağlı Avropa Məhkəməsinə müraciət edəcəyik", deyə vəkil bidirib.

Öz növbəsində, F.Qasımovun ailəsi iqtisadçının xahişini "dünyanın elm xadimlərinə, dünya liderlərinə" çatdırmaq xahişi ilə müraciət edib.

"Mən, Azərbaycanda həbs olunmuş UN GSP-nin (BMT-nin Cenevrə ofisində ixtisasartırma proqramı) məzunu 22 gündür qanunsuz həbsimə etiraz olaraq aclıq edirəm. Artıq gücüm tükənir, təzyiqim düşüb, gözlərim qaralır. Bütün bədən əzələlərimdə şiddətli ağrılar yaranıb.

35 yaşlı elm adamının şərlənərək həbsdə ölməsinə biganə qalmamağı Sizlərdən xahiş edirəm", deyə müraciətdə bildirilir.

Penitensiar Xidmətdən, Ombudsman Aparatından, Ədliyyə Nazirliyindən şərh almaq mümkün olmayıb.

İstanbul Universitetinin doktorantı, iqtisadçı alim Fazil Qasımov ötən ilin avqust ayının 7-də Türkiyədə saxlanılıb və Azərbaycana gətirilib, ona Cinayət Məcəlləsinin 204.3.1 (saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham verilib.  Fazil Qasımovun istintaqa verdiyi ifadədə  hazırda polis nəzarətində olan müxalif siyasətçi Qubad İbadoğluya  saxta pulları  verdiyi  iddia olunur.

Fazil Qasımov  Baş prokurorluğa, Ombudsmana, yerli və beynəlxalq ictimaiyyətə ünvanladığı məktublarında istintaqa ifadənin işgəncə altında verdiyini və ifadəsində yer alan fikirlərin müstəntiqə və vəkilə məxsus olduğunu bildirir. O  məktublarında  əvvəlki ifadəsindən imtina edərək, Qubad İbadoğluna  saxta pul vermədiyini, onunla heç vaxt FETO və dini mövzuda  müzakirə aparmadığını açıqlayıb.

Qasımov iyunun 14-dən etibarən əsassız cinayət təqibinə və ilkin həbs zamanı məruz qaldığı işgəncələrə etiraz əlamət olaraq aclıq edir.