Araz Əliyevin xanımı Daxili İşlər Nazirliyini onun həbs olunduğunu etiraf etməyə məcbur edib

Bakı/25.12.23/Turan: Dekabrın 24-də siyasi fəal Araz Əliyevin xanımı Gülarə İsmayılova Daxili İşlər Nazirliyinin binası qarşısında etiraz aksiyası keçirib.

O, binanın qarşısında dayanaraq "Araz Əliyev haradadır?” yazılmış plakat qaldırıb. İsmayılova Daxili İşlər Nazirliyinin rəhbərliyinə müraciətlə bu şüarı səsləndirməyə başlayıb.

O, polis tərəfindən saxlanılıb və Səbail rayonunun 9-cu polis bölməsinə aparılıb. Bölmədən çıxarkən jurnalistlərə bildirib ki, etiraz aksiyasının  qanunsuzluğu barədə xəbərdarlıq ediblər. Həyat yoldaşının taleyinə gəlincə, deyiblər ki, bu haqda məlumat açıqlanacaq.

Aksiyadan bir neçə saat sonra Daxili İşlər Nazirliyi bildirib ki, Araz Əliyev "xırda xuliqanlığa" görə 25 sutka həbs edilib. Ancaq nazirlik bunun nədən ibarət olduğunu, harada baş verdiyini açıqlamağı unudub.

Xatırladaq ki, dekabrın 23-də axşam "Üçüncü respublika" platformasının həmtəsisçisi Araz Əliyevlə əlaqə kəsilib. Eyni zamanda, "Üçüncü respublika" platformasının spikeri Akif Qurbanov təqib edilməyə başlayıb.

Sutka ərzində Daxili İşlər Nazirliyi Araz Əliyevin saxlandığını  etiraf etməyib və yalnız onun xanımının ictimai etiraz aksiyasından sonra həbs olunduğunu bildirib.

"Üçüncü respublika"nın təsisçiləri Azərbaycanda avtoritazizmdən imtinaya, parlament respublikasına keçidə və real demokratiyaya nail olmağın zəruriliyini bəyan etdikdən sonra onlara qarşı təqiblər başlayıb.

Bu siyasi platformanın təsis sənədlərində qeyd olunub ki, 1993-cü ildə Heydər Əliyevin hakimiyyətə gəlişilə ikinci respublikanın süqutu başlayıb və avtoritarizm rejimi qurulub.

Üçüncü respublika Azərbaycanı demokratiya məcrasına qaytarmalıdır. -02B-