AŞPA-nın Azərbaycan üzrə məruzəçisi Əfqan Muxtarlı və Gözəl Bayramlı barəsində hökmləri pisləyib

Bakı/24.01.18/Turan: AŞPA Monitorinq Komitəsinin həmməruzəçisi Stefan Şennak Azərbaycanda jurnalist Əfqan Muxtarlı və Xalq Cəbhəsi Partiyasının sədr müavini Gözəl Bayramlı barəsində hökmləri pisləyib.

"Sual edə bilərəmmi, niyə? Mən onun məhkəməsindən narahatam, onun həbsi səhv idi, qanunun aliliyinə riayət olunmayıb", deyə Şennak Twitter-dəki mikrobloqunda Bayramlı barəsində hökmlə bağlı yazıb.

Bir neçə gün əvvəl Şennak jurnalist Əfqan Muxtarlı barəsində hökmlə bağlı da narahatlığını bildirərək, Twitter-də həmkarı ilə birlikdə Azərbaycanda və Gürcüstanda Muxtarlının işini araşdırdığını yazıb. Məruzəçi Əfqanın Gürcüstanda oğurlanması ilə bağlı narahatlığını bildirib. "O, həbsdə olmamalıdır", deyə Şennak yazıb.

* Bayramlı 2017-ci il mayın 25-də Gürcüstandan qayıdarkən sərhəd-buraxılış məntəqəsində saxlanılıb. Onun barəsində CM-in 206.1-ci (qaçaqmalçılıq) maddəsi ilə cinayət işi açılıb və o, həbs edilib.

İstintaqın məlumatına görə, Bayramlının baqajına baxış zamanı guya onun bəyan etmədiyi 12 min dollar aşkar edilib.

Bayramlı bildirib ki, pulu onun üzərinə qəsdən qoyublar, həbsi isə siyasi sifariş xarakteri daşıyır. O, həmçinin bildirib ki, Gürcüstana müalicəyə getmişdi və son iki ildə üç dəfə orada əməliyyat olunub. Yanvarın 23-də məhkəmə onu üç il müddətinə azadlıqdan məhrum edib.

Yerli və beynəlxalq hüquq müdafiə təşkilatları Bayramlını siyasi məhbus kimi tanıyıblar.

** Muxtarlı 2017-ci il mayın 29-da Tbilisidə Gürcüstanın polis əməkdaşları tərəfindən oğurlanıb və Azərbaycan hakimiyyətinə təhvil verilib. Bu zaman onun cibinə 10 min avro qoyublar və onu sərhədi qanunsuz keçməkdə və qaçaqmalçılıqda ittiham ediblər.

Muxtarlı Bakıda təqibə məruz qaldıqdan sonra Tbilisiyə köçüb, Azərbaycanın müxalif nəşrləri ilə işləyir, Azərbaycan hakimiyyətinin yüksək eşelonlarında korrupsiya faktlarının araşdırılması ilə məşğul olurdu. -03B06-