AŞPA-nın seçkiöncəsi missiyası parlament seçkilərini müşahidə edəcəyini bildirir

Azərbaycanın QHT sektorunun bir qrup nümayəndəsi çərşənbə axşamı ölkəyə səfərə gələn AŞPA-nın seşkiöncəsi missiyasının üzvlərilə görüşüb. Bu haqda Turan-a hüquq müdafiəçisi Novella Cəfəroğlu bildirib.

Onun sözlərinə görə, missiya təmsilçiləri Azərbaycanda parlament seçkilərini müşahidə edəcəklərini deyiblər. Azərbaycan QHT təmsilçiləri bunu müsbət qarşılayıblar.

QHT təmsilçiləri ölkədə ancaq majoritar seşki sisteminin fəaliyyətdə olduğunu vurğulayıblar. Partiyaların daha da fəallaşa bilməsi, ölkə rayonlarına çıxa bilməsi üçün proporsional seşki sisteminin bərpasını vacib sayıblar. Onlara görə, majoritar seçki sistemində məmurlar seçki prosesinə daha çox müdaxilə imkanına malik olurlar.

Görüşdə insan haqlarının, söz azadlığının, QHT-lərin mövcud durumunun müzakirə edildiyi nəzərə çatdırılıb. Avroparlamentin məlum qərarından sonra QHT-lərin durumunun daha da gərginləşdiyi, müxtəlif yoxlamalara məruz qaldığı qeyd olunub. Missiya təmsilçilərindən xahiş edilib ki, dövlət başçısı ilə görüşdə QHT-lərin fəaliyyətilə bağlı qanun təhlil edilsin və həmin qanunun “mülayimləşdirilməsi” məsələsi müzakirə olunsun.  

Missiya təmsilçilərinə düşüncələrini açıqladıqlarını deyən N.Cəfəroğlu mövcud durumda həbsdə olan siyasi məhbusların azad edilməsinin gərginliyi azalda biləcəyini vurğulayıb. -05B-