ATƏT-in Minsk Qrupunun həmsədrləri Ermənistana səfərləri haqqında

Bakı/14.06.18/Turan: ATƏT-in Minsk Qrupunun həmsədrləri İqor Popov (RF), Stefan Vsikonti (Fransa) və Endryu Şofer (ABŞ) iyunun 12-14-də Ermənistana səfərlərinin yekunları ilə bağlı bəyanat yayıblar.

Onlar ATƏT-in fəaliyyətdə olan sədri Andjey Kaspşiklə birlikdə xarici işlər naziri Zöhrab Mnatsakanyan, baş nazir Nikol Paşinyan, müdafiə naziri David Tonoyan və Ermənistan prezidenti Armen Sarkisyana görüşlər keçiriblər.

Həmsədrlər və Ermənistan rəsmiləri danışıqların gedişatına baxıblar və prosesin təşviqi üzrə növbəti addımları, o cümlədən nazirlərin yaxın gələcəkdə nəzərdə tutulan görüşünü müzakirə ediblər.

Onlar həmçinin Ermənistan-Azərbaycan sərhədində və təmas xəttində hazırki vəziyyət haqqında fikir mübadiləsi aparıblar, "konstruktiv mühitin qorunub saxlanmasının əhəmiyyətini" qeyd ediblər, deyə vasitəçilərin bəyanatında bildirilir.

Həmsədrlər bir daha tərəflərə yardım etməyə, Helsinki Yekun Aktının əsas prinsipləri, o cümlədən güc tətbiq etməmə və ya güc tətbiq etməklə hədələməmə, ərazi bütövlüyü, habelə bərabərhüquqluluq və xalqların öz müqəddəratını həll etməsi prinsipləri əsasında münaqişənin sülh yolu ilə həllini tapmağa hazır olduqlarını təsdiq ediblər.

Ermənistan rəsmiləri ATƏT-in Minsk Qrupunun və şəxsi nümayəndənin işini dəstəklədiklərini bildiriblər və həmsədrlərin himayəsi altında səmərəli işi davam etdirməyə hazır olduqlarını qeyd ediblər, deyə bəyanatda bildirilir.

Mayda Ermənistanda hakimiyyət dəyişdikdən sonra bu, həmsədrlərin Yerevana ilk səfəridir. -06D-