ATƏT-in Minsk Qrupunun həmsədrləri tərəfləri təxribat yaradan bəyanatlar verməməyə çağırıblar

Bakı/12.02.18/Turan: ATƏT-in Minsk Qrupunun həmsədrləri (İqor Popov - Rusiya, Stefan Vsikonti - Fransa və Endryu Şofer - ABŞ) ATƏT sədrinin şəxsi nümayəndəsi Anjey Kasprşiklə birlikdə fevralın 7-də Bakıda prezident İlham Əliyevlə və fevralın 9-da Yerevanda prezident Serj Sarkisyanla görüşüblər.

Hər iki paytaxtda onlar iki ölkənin xarici işlər nazirləri ilə məsləhətləşmələr aparıblar.

Həmsədrlər həmçinin faktiki hakimiyyətlə görüşmək üçün fevralın 9-11-də Dağlıq Qarabağa da səfər ediblər, Zəngilan, Qubadlı, Ağdam, Laçın və Kəlbəcərdə konkret yerləri ziyarət ediblər, bu barədə MQ həmsədrlərinin fevralın 11-də ATƏT-in saytında yerləşdirilmiş bəyanatında deyilir.

"Həmsədrlər 2017-ci ilin oktyabrında Cenevrədə və əvvəlki sammitlərdə, xüsusən Vyana və Sankt-Peterburq sammitlərində götürülmüş bütün öhdəliklərin vicdanla yerinə yetirilməsinin əhəmiyyətini vurğulayıblar.

Həmsədrlər bu yaxınlarda təmas xəttində insanların həlak olması ilə bağlı dərin narahatlıqlarını ifadə ediblər.

Həmsədrlər tərəfləri Cenevrədə razılaşdırıldığı kimi, gərginliyin azaldılması üçün əlavə addımlar atmağa və atəşkəs rejiminə riayət etməyə çağırırlar.

Həmsədrlər həmçinin tərəfləri təhrikedici bəyanatlardan və təxribat xarakterli əməllərdən uzaq durmağa çağırırlar",deyə bəyanatda qeyd edilir.

Həmsədrlər bir daha Tərəflərə Helsinki əsas prinsipləri, o cümlədən güc tətbiq edilməməsi, ərazi bütövlüyü, bərabər hüquqlar və xalqların öz müqəddəratını təyin etməsi prinsipləri əsasında münaqişənin sülh yolu ilə həllini tapmaq qətiyyətlərini bəyan edirlər.

Həmsədrlər hazırki seçki dövrünü nəzərə alaraq, tərəflərin intensiv danışıqları davam etdirmək niyyətini alqışlayıblar, deyə bəyanatda bildirilir. -0-