ATƏT MQ ölkələri Ermənistanın xeyrinə hərəkət edir – İ.Əliyev

Bakı/26.10.20/Turan: ATƏT-in Minsk Qrupunun həmsədrləri Qarabağ münaqişəsinin nizamlanması mövzusunu inhisara götürüblər, Minsk Qrupunun özünün fəaliyyəti iflic vəziyyətə düşüb. Bu barədə oktyabrın 26-da prezident İlham Əliyev xalqa telemüraciətində bildirib.

“Onların fəaliyyətinin Bizim üçün nəticəsi olmadı, Ermənistan üçün oldu. Ermənistan elə bu nəticəni istəyirdi ki, daim danışıqlar getsin, daim bizim başımızı aldatsınlar, dondurulsun bu məsələ, əbədi qalsın əsarət altında bizim torpağımız, əbədi qalsın işğal altında bizim torpağımız.

Dəfələrlə mən onların qarşısında məsələ qaldırmışdım: əgər məsələnin həllini görmək istəyirsinizsə sanksiyalar tətbiq edin Ermənistana. Sizin əlinizdədir. Siz BMT Təhlükəsizlik Şurasının daimi üzvlərisiniz, istənilən məsələni həll edə bilərsiniz”, deyə Əliyev bildirib.

O, üç ölkənin – Rusiya, ABŞ və Fransanın bu məsələdə mövqelərinin üst-üstə düşməsinin qəribə olduğunu bildirib.

“Necə olur, bütün başqa məsələlərdə - nüvə silahları ilə bağlı, Yaxın Şərqdə olan vəziyyətlə bağlı, Asiyada olan vəziyyətlə bağlı, Avropada olan vəziyyətlə bağlı bunların maraqları daban-dabana ziddir. Ancaq Dağlıq Qarabağ məsələsində. Hər kəs başa düşür. Çünki bu dondurulmuş vəziyyət, təbii ki, bu ölkələr arasında bizdən başqa hər kəsi qane edirdi, ilk növbədə, Ermənistanı qane edirdi”, deyə Əliyev qeyd edib. –70D06-